नेपालको संविधान २०७२ को धारा ३५ मा स्वास्थ्यसम्बन्धी हक अन्तर्गत प्रत्येक नागरिकलाई स्वच्छ खानेपानी तथा सरसफाइको हकको स्पष्ट व्यवस्था गरिएको भएपनि साँफेबगर नगरपालिका–२ बागभिडीस्थित दलितबस्तीका १ सय ५० बढी परिवार नदीको दुषित पानी पिउन बाध्य भएका छन् ।
मुहानमा पानी सुक्दै गएको र वैकल्पिक व्यवस्था नभएका कारण बागभिडीका स्थानीयहरुले नदीको दुषित पानी पिउन बाध्य भएका हुन् ।
खानेपानीको अभावमा बुढीगंगा नदीको धमिलो पानी खान बाध्य भएको स्थानीय सम्झना आउजीले दुखेसो पोख्नु भयो ।
आधा घण्टाको पैदल दुरीमा रहेको बुढीगंगा नदीमा बिहानै गएर फोहर पानी ल्याएर खानु पर्ने बाध्यता रहेको स्थानीय पशुपति परियारले दुखेसो पोख्नु भयो ।
पानीको अभावमा खानेपानी, सरसफाइमा धेरै समस्या हुने गरेको स्थानीय ज्येष्ठ नागरिक जोगी विकले गुनासो गर्नु भयो । पानीको अभाव भएपछि सरसफाइ गर्न समस्या भएपनि साँझ ज्यालामजदुरी गरेर घर फर्किएपछि हातमुख नधोएरै सुत्तु परेको स्थानीय डिक्रा आउजीले दुखेसो पोख्नु भयो ।
उहाँले भन्नु भयो– ‘बालबालिकाको सरसफाइ, लुगाफाटो धुन र शौचालय समेत सरसफाइ गर्न समस्या भएको छ । वर्षाको बेलामा त नदीको पानी खान नसकिने अवस्था हुन्छ । साना केटाकेटी बिरामी हुने डर धेरै छ ।’
दुषित पानीले साना केटाकेटी बिरामी हुन्छन् कि भन्ने चिन्ता लागि रहने स्थानीय पशुपति परिवारको भनाइ छ । दुषित पानी पिउँदा शरिरमा आक्रमणका कारण तत्कालिन र दीर्घकालिन रोगले आक्रमण गर्ने स्वास्थ्यकर्मीको भनाइ छ ।
फोहोर पानीले पेट दुख्ने, वाकवाकी लाग्ने, टाइफाइड बिग्रिएर ज्यान समेत जान सक्ने र दुषित पानी पिउदा तत्कालिन तथा दिर्घकालिन रोगहरुको सङ्क्रमण बढने जिल्ला अस्पताल, अछामका डाक्टर प्रेमप्रसाद ढुङ्गानाले बताउनु भयो ।
खानेपानीका लागि वडाका जनप्रतिनिधिलाई जानकारी गराउँदा आश्वसन मात्रै पाएको बागभिडीका दलित समुदायको आरोप छ ।
पानीको मुहान मै समस्या देखिएकोले दलितबस्तीमा खानेपानीको समस्या उत्पन्न भएकोले गर्दा डीप बोरिङबाट पानी ल्याएर घरघरमा पुर्याउने योजना रहेको साँफेबगर नगरपालिका–२ का अध्यक्ष कालुसिंह कुँवरले बताउनु भयो ।