चार महिनामा दुई दिन मात्र सामाजिक सुरक्षा भत्ता वितरण हुने भन्ने सूचना बुझेपछि भत्ता लिन आएका ज्येष्ठ नागरिकले सास्ती भोग्नु परेको गुनासो गरेका छन् ।
सरकारले बैङ्किङ् प्रणालीमार्फत सुरक्षा भत्ता दिने व्यवस्था गरेपछि र बैङ्कले दुई दिन मात्रै वितरण गर्ने भन्ने सूचना ज्येष्ठ नागरिकले बुझेपछि भत्ता लिन आएका ज्येष्ठ नागरिकले सास्ती व्यहोर्नुपरेको गुनासो गरेका हुन् ।
ज्येष्ठ नागरिक शोरदराम थापाले भत्ता लिन टाढाबाट आउनुपर्ने र आइसकेपछि पनि निकै लामो लाइनमा बस्नुपर्ने हुँदा आफूहरूलाई समस्या भएको जानकारी दिनुभयो ।
सरकारले ज्येष्ठ नागरिकलाई बैङ्किङ् प्रणालीमार्फत भत्ता दिन सुरू गरेपछि भत्ताको सुरक्षा भएपनि टाढाबाट भत्ता लिन सदरमुकाममा रहेको बैङ्कसम्म पुग्दा आफूहरूलाई समस्या भइरहेको उहाँको भनाई थियो ।
सबै स्थानीय तहले ज्येष्ठ नागरिकको सूची प्रत्येक तीन महिनामा अपडेट गर्ने र एकै चोटि भत्ता लिन बोलाउँदा बैङ्कमा भिडभाड हुने गरको छ ।
ज्येष्ठ नागरिकको लागि भत्ता जम्मा गरिने बैङ्क सबै स्थानीय तहमा उपलब्ध नहुँदा पनि समस्या भएको स्थानीय तहहरूले जनाएका छन् ।
नेपाल बैङ्क लिमिटेड रुकुम शाखाका प्रमुख शसीराम केसीले ज्येष्ठ नागरिकलाई भत्ता लिने समय र प्रक्रियाका बारेमा सरोकारवालाले तथ्य जानकरी नगराउँदा यस्तो समस्या आएको बताउनुभयो ।
ज्येष्ठ नागरिकले पाउने रकम खातामै सुरक्षित हुने र सो रकम अनुकूलताका आधारमा जहिले लिए पनि हुने भन्ने कुरा ज्येष्ठ नागरिकलाई बुझाउनुपर्ने आवश्यक देखिएको उहाँको भनाई छ ।
मुसीकोट नगरपालिकाका प्रशासकीय अधिकृत नरवीर खड्काले ज्येष्ठ नागरिकको खातामा भत्ता जम्मा गर्दा भत्ता सुरक्षित हुने भएकाले खातामा नै राखिदिने गरेको बताउनुभयो ।
ज्येष्ठ नगरिकले भत्ता जुनसुकै बेला झिकेपनि हुने कुराको जानकारी गराउन नसकेको उहाँले स्वीकार गर्नुभएको छ ।