राजपुर गाउँपालिका–७ स्थित सिक्टा माविमा कार्यरत शिक्षिका ३५ वर्षीया विशाल खत्रीलाई कक्षा कोठामै दुर्व्यवहार गरेको आरोपमा विद्यालयका प्रधानाध्यापक ३८ वर्षीय विष्णु खत्रीलाई इलाका प्रहरी कार्यालय गढवाले पुस ७ गते गिरफ्तार गरेको छ ।
पीडितलाई आरोपितले पुस ५ गते बालविकास कक्षामा पठन पाठन गराइरहेका बेला प्रधानाध्यापक खत्रीले विद्यालयको नियम विपरित कपालमा रातो मेहन्दी लगाएको भन्दै रजिष्टर खोसेर कक्षा कोठाबाट लछार पछार गर्दै निकालेको पीडितले पुस ७ गते लमहीमा पत्रकार सम्मेलन गरेर जानकारी दिनुभयो । उहाँले ध्यानाकर्षण गराएर हुने कुरालाई विद्यार्थीकै अगाडि कक्षा कोठाबाट लछार पछार गरी निकाल्दा कपडासमेत च्यातिएको बताउनु भयो । घटनाका विषयमा पीडितले पुस ६ गते इलाका प्रहरी कार्यालय, गढवामा उजुरी दिनु भयो ।
आरोपित खत्रीले विद्यालयमा शिक्षक, विद्यार्थीले तडक भडकपूर्ण व्यवहार नगर्ने, कपालमा रङ्ग नलगाउने नियम राखिएकाले शिक्षिकाले नियम उल्लङ्घन गर्दा ध्यानाकर्षण गराएको बताउनु भयो ।
आरोपितलाई जिल्ला प्रशासन कार्यालयबाट पुस ७ गते म्याद थप गरी अनुसन्धान थालिएको इलाका प्रहरी कार्यालय गढवाका इन्स्पेक्टर राजकुमार भट्टले जानकारी दिनुभयो ।