उर्लावारी नगरपालिका–४ की १२ वर्षीया फूलसरी मङ्ग्राती(सार्की) लाई पानी छोएको निहुँमा कुटपिट गरेको आरोपमा प्रहरीले सोही ठाँउका २३ वर्षीय अमिर श्रेष्ठलाई भदौ २३ गते गिरफ्तार गरेको छ ।
भदौ २२ गते पीडित बालिका आरोपितको घरमा फ्रिजमा राखिएको पानी माग्न गएको र सोही समयमा आरोपितले सोहृ श्राद्दका समयमा घरभित्र पसेको आरोपमा बालिकालाई कुटपिट गरेको पीडित बालिकाकी आफन्त ५० वर्षीया दुर्गाकुमारी रोकाले बताउनु भयो ।
घटनामा संलग्न भएको आरोपमा दुर्गाकुमारीले भदौ २२ गते इलाका प्रहरी कार्यालयमा उजुरी दिएपछि आरोपितमध्येका एक जनालाई गिरफ्तार गरेको जिल्ला प्रहरी कार्यालयका एसपी सन्तोष खड्काले इन्सेक प्रतिनिधिसँगको फोन सम्पर्कमा बताउनु भयो ।
घटनाका आरोपित ६० वर्षीय नन्दलाल श्रेष्ठ र ४७ वर्षीया निर्मला श्रेष्ठ फरार रहेको र उनीहरूको खोजी भईरहेको एसपी खड्काले बताउनु भयो ।
पानी लिन गएकी बालिकालाई सुरूमा अमिर श्रेष्ठले थप्पडले हिर्काएको र त्यसपछि परिवारका अन्य सदस्यले कुटपिट गरेको प्रारम्भिक अनुसन्धानमा खुलेको एसपी खड्काले बताउनु भयो ।
कुटपिटबाट पिठ्युमा चोट लागेकी बालिकाको उपचार भदौ २३ गते उर्लावारीस्थित मङ्गलवारे अस्पतालमा गरिएको छ ।
आरोपितमाथि जातीय छुवाछूत तथा भेदभाव शीर्षकमा उजुरी दर्ता गरी कारबाही अघि बढाएको प्रहरीले जनाएको छ ।
नेपालको संविधान २०७२,धारा २४ मा छुवाछूत तथा भेदभावविरूद्धको हक सम्बन्धी व्यवस्था गरिएको छ । उक्त धाराको उपधारा १ मा कुनै पनि व्यक्तिलाई निजको उत्पत्ति,जातजाति,समुदाय,पेशा,व्यवसाय वा शारीरिक अवस्थाको आधारमा कुनै पनि निजी तथा सार्वजनिक स्थानमा कुनै प्रकारको छुवाछूत वा भेदभाव गरिने छैन भन्ने उल्लेख छ ।
सोही धाराको उपधारमा ५ मा सबै प्रकारका छुवाछूत तथा भेदभावजन्य कार्य गम्भीर सामाजिक अपराधका रूपमा कानुनी बमोजिम दण्डनीय हुनेछन् र त्यस्तो कार्यबाट पीडित व्यक्तिलाई कानुनबमोजिम क्षतिपूर्ति पाउने हक हुनेछ भन्ने व्यवस्था गरिएको छ ।
