लिसङ्खु पाखर गाउँपालिका–७ स्थित डाँडाँपाखर स्वास्थ्य चौकीमा झाडापाखाला लागेको बिरामीलाई अत्यावश्यक पर्ने औषधि जीवनजल समेत नहुदा स्वास्थ्य चौकीमा आउने बिरामीहरू मर्कामा परेका छन् ।
पखाला लागेर बिरामी भई डाँडाँपाखर स्वास्थ्य चौकी आएकी लिसङ्खु पाखर गाउँपालिका–७ की अन्जु लामाले जीवनजल औषधि समेत नपाएर आफु रित्तो हात घर फर्केको बताउनु भयो । लिसङ्खु पाखर गाउँपालिका–७ का ५४ वर्षीय रामजी तामाङले पनि झाडापाखाला लागेर स्वास्थ्य चौकी गएका बेला आफूले जीवनजल समेत नपाएको सुनाउनु भयो ।
बिरामीहरूको चापलाई भन्दापनि पालिकाको सबै वडाका स्वास्थ्य चौकीहरूलाई समानुपातिक रुपले गाउँपालिकाले औषधि वितरण गरेका कारण औषधिको अभाव भएको डाँडाँपाखर स्वास्थ्य चौकीका इन्चार्ज अहेव लक्ष्मीकान्त बजगाईंले बताउनु भयो ।
जनसङ्ख्याको हिसावले अरु वडाभन्दा ठूलो भएको र बिरामीको चाप बढी हुने गरेकोले औषधि नपुग भएको अहेव बजगाईंकोे भनाइ छ । गर्मीयाम शुरु भएसँगै मौसमी फ्लु तथा झाडापखालाका बिरामी धेरै आउने भएकाले जुकाको औषधि पनि अभाव भएको स्वास्थ्य चौकीमा कार्यरत अनमी सानुदेवी जिरेलले बताउनु भयो । तर,स्वास्थ्य चौकीका इन्र्चाजले समयमा औषधि माग नगरेका कारण औषधिको अभाव भएको गाउँपालिकाका अध्यक्ष कमल नेपालले बताउनु भयो । ‘यो अभावलाई तत्काल पूर्ति गरिने छ’ पालिका अध्यक्ष नेपालले भन्नुभयो ।