सप्तकोशी नपा–३ का ४८ वर्षीय बल्कुराम सदाको हत्या आरोपमा उहाँकै भाई सोही ठाउँका ४२ वर्षीय बलराम सदा मुसहरलाई सप्तरी जिल्ला अदालतले माघ १५ गते १० वर्ष कैद सजायको फैसला गरेको छ ।
जिल्ला न्यायाधीश नन्दकिशोर प्रसाद यादवको इजलाशले बलरामलाई हत्या घटनाको दोषी ठहर गर्दै १० वर्ष कैद सजायको फैसला गरेको स्रेस्तेदार दिलकुमार वर्देवाले बताउनु भएको छ ।
मादक पदार्थ खाएका बलरामले ०७४ साउन २६ गते राति १०ः०० बजे राँगा बाँध्ने किलोले कुटपिट गर्दा बल्कुरामको साउन २७ गते विहान मनकामना पोलि क्लिनिक फत्तेपुरमा उपचारका क्रममा मृत्यु भएको थियो ।
शवको पोष्टमार्टम राजविराजस्थित गजेन्द्रनारायण सिंह अस्पतालमा ०७४ साउन २७ गते भएको प्रहरीले जनाएको थियो ।
मृतककी पत्नी ४५ वर्षीया रम्भा सदाले ईलाका प्रहरी कार्यालय कञ्चनरुपमा ०७४ साउन २७ गते उजुरी दिनु भएको थियो । हत्या घटनाको आरोपमा बलरामलाई प्रहरीले साउन २७ गते गिरफ्तार गरेकोमा जिल्ला अदालतको आदेशमा ०७४ भदौ २० गतेदेखि पुर्पक्षका लागि राजविराज कारागारमा थिए ।