घरेलु हिंसा पीडित शुद्धोधन गाउँपालिका–२ सानो कर्माकी ३७ वर्षीया अवरुन निसा मुसलमानले इन्सेकको सहयोगमा जिल्ला प्रहरी कार्यालयमा उजुरी दर्ता गराएकी छन् ।
गत जेठ १३ गतेदेखि पीडितका पति असवर अली मुसलमान घर छाडेर सम्पर्कविहीन भएपछि सासू तबरुन निसा र ससुरा नेवास अली खानले खान, लाउन र बस्न नदिई कात्तिक २५ गते घर निकाला गरेको पीडितले आरोप लगाएकी छन् ।
घरमा सासू र ससुराले पहिले देखिनै गास, बास र लाउन नदिनुको साथै कुटपिट गरेपछि लबनी प्रहरी चौकी हुँदै जिल्ला प्रहरी कार्यालय तौलिहवासम्म पटक–पटक धाउँदा न्याय पाउन नसकेको पीडितले बताइन् ।
घरबाट निकालेपछि तीन छोरा र तीन छोरीसहित सडकमा बस्दै आएकी पीडितले इन्सेक जिल्ला प्रतिनिधि पार्वती अचार्यलाई न्यायको लागि पहल गरिदिन आग्रह गरेकी थिइन् ।
जिल्ला प्रतिनिधि आचार्यले पीडित समेतलाई लिएर जिल्ला प्रहरी कार्यालयका डिएसपी सुनिल मल्लसँग छलफल गरी उजुरी दर्ता गराएकी हुन् ।
यसअघि प्रहरीले मिलापत्र गराएपनि घटना पुनः दोहरिएपछि पीडितलाई नै आरोप लगाएर जिल्ला प्रहरी कार्यालयको महिला बालबालिका सेवा केन्द्रले उजुरी लिन नमानेको पीडितले बताइन् । डिएसपी मल्लले कानुनी प्रक्रिया अनुसार कारवाही अगाडि बढाइने बताए ।