चैनपुर नगरपालिका–१ नुनढाकी स्वास्थ्य चौकीमा स्वास्थ्यकर्मी अभावका कारण सुरक्षित प्रसूति केन्द्र (वर्थिङ सेन्टर) सञ्चालन हुन नसक्दा गर्भवती महिलाहरूले समस्या झेल्नु परेको छ ।
सुरक्षित प्रसूति केन्द्रमा कार्यरत स्वास्थ्यकर्मीहरू समायोजन भई अन्यत्र गइसकेको र समायोजनबाट आउने स्वास्थ्यकर्मी नआएकोले गर्भवती महिलाहरूले समस्या भोग्नु परेको हो ।
असोज २९ गते स्वास्थ्य चौकी नुनढाकी पुगेकी स्थानीय २९ वर्षीया सावित्रा लिम्बु स्वास्थ्यकर्मी नभएकै कारण गर्भवती जाँच नगराई फर्किएको भन्दै गुनासो गरिन् ।
उनले भनिन्–‘म दशैँ अगाडि पनि गर्भ जाँच गराउन आएको थिए त्यतिबेला पनि स्वास्थ्यकर्मी थिएनन् । आज फेरि आएँ । आज पनि छैनन् ।’
विनाकुमारी लिम्बुको पनि यस्तै दुखेसो छ । उनले भनिन्–‘गर्भ जाँच गर्न पाउनु हाम्रो अधिकारको कुरा हो । तर, स्वास्थ्यकर्मी नभएकोले म आजसमेत तीन पटक जाँच नगराई फर्किसकेको छु ।’
चैनपुर नगरपालिकाका नगर प्रमुख भरतकुमार खत्रीले समायोजन भएर स्वास्थ्यकर्मीहरू अन्यत्रै जाँदा र नयाँ नआउँदा यो समस्या झेल्नु परेको दुखेसो गरे ।
उनले भने–‘यो त उदाहरण मात्रै हो चैनपुर नगरपालिकाका अन्य स्वास्थ्य चौकीहरूमा पनि यस्तै समस्या छ । जाने कर्मचारीको लागि हामीले रमना दिएर पठायौँ । तर, आउनेले ढिलो गर्दा यो समस्या भएको हो ।’
नुनढाकीबाट चैनपुर नगरपालिकामा रहेको प्राथमिक स्वास्थ्य केन्द्र आउनु पर्ने गर्भवती महिलााई बाध्यता परेको छ । नुनढाकीबाट चैनपुर आइपुग्न पैदल ८ घण्टा लाग्ने गरेको छ ।
चैनपुर नगरपालिकाको वडा नं ११ मा अवस्थित खराङ स्वास्थ्य चौकीमा उस्तै समस्या रहेको छ । असोज २६ गते स्थानीय २६ वर्षीया निर्मला दाहाललाई सुत्केरी व्यथाले च्यापेपछि उनका आफन्तले घरदेखि करिब दुई घण्टा टाढा रहेको स्वास्थ्य चौकीमा भएको बर्थिङ सेन्टरसम्म पु¥याए ।
तर, वर्थिङ सेन्टरमा कुनै स्वास्थ्यकर्मी नभएकोले उनी त्यहीँको चौरमा सुत्केरी भएको उनका पति सुरेन्द्र दहालले बताए ।
गत असोज २५ गते स्थानीय शर्मिला भुजेललाई पनि सुत्केरी व्यथाले च्यापेपछि खराङ स्वास्थ्य चौकीमा पुर्याइएकी स्थानीय शारदा राउतलाई पनि स्वास्थ्यकर्मी नभेटे सुरक्षित रूपमा घर फर्काइएको उनका आफन्त खड्कबहादुर राउतले बताए ।
संविधानको मौलिक हक अन्तर्गत धारा ३५ मा स्वास्थ्यसम्बन्धी हकमा आधारभूत स्वास्थ्य सेवा निःशुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित नगरिने उल्लेख गरिएको भएपनि सो सेवाबाट वञ्चित हुनुपरेको स्थानीयको आरोप छ ।
नगर प्रमुख भरतकुमार खत्रीले स्वास्थ्यकर्मीहरू नगरपालिकामा हाजिर हुन आउने बितिकै सबैलाई खटाइने बताए ।