करारमा रहेका कर्मचारीको सेवा अवधि थप गर्ने विषयमा कुरा नमिल्दा उर्लावारी नगरपालिकाका मेयर खड्ग फागोले आफूलाई हातपात गरेको प्रशासकीय अधिकृत टेककुमार रेग्मीले आरोप लगाएका छन् ।
असोज ७ गते विराटनगरमा पत्रकार सम्मेलन गरी मेयरले कार्यकक्षमा आएर हातपात गरेको पीडितको आरोप छ ।
जनप्रतिनिधिको व्यवहारले काम गर्ने वातावरण नभएको मात्र नभई ज्यान नै असुरक्षित भएपछि आफ्नो सामानसहित प्रहरीको सुरक्षा घेरामा असोज ७ गते विराटनगर आएको पीडित प्रशासकीय अधिकृतको भनाई छ ।
मेयरको कार्यशैलीले परिवार समेत असुरक्षित भएपछि प्रशासनसँग सुरक्षा मागेर विराटनगर आएको प्रशासकीय अधिकृत रेग्मीको गुनसो छ ।
नगरपालिकाले राखेका करारका कर्मचारीको सेवा अवधि थप गर्ने विषयमा मेयर फागोले एक वर्ष थप गर्न दबाब दिएपछि प्रशासकीय अधिकृत रेग्मीले लोकसेवाको नियमानुसार ६ महिनामात्र थप गर्न सुझाव दिँदा दुव्र्यवहार खेप्नु परेको बताए ।
प्रशासकीय अधिकृत रेग्मीले ‘लोकसेवाको नियमअनुसार ६ महिनामात्र थपौँ’ भन्दा मेयरले लोकसेवा जान्दिन बरू अधिकृतलाई नै ठीक पार्छु भनी दुव्र्यवहार गरेको गुनासो पत्रकार सम्मेलनमा गरेका छन् ।
नगरपालिकाले विभिन्न पदमा गरी ५० जना कर्मचारी करारमा नियुक्ति गरेको अधिकृत रेग्मीले बताए । रेग्मीले घटना पछि सोही दिन मोरङका प्रमुख जिल्ला अधिकारी मदन भुजेललाई भेटेर सुरक्षा माग गरेको बताए ।
मेयर फागो र आफूबीच गत भदौ २६ गते पनि विवाद भएको पीडितले पत्रकार सम्मेलनमा बताएका छन् ।
विवादपछि मेयर फागोले रेग्मीको भदौ २६ गते क्वाटरमा ताला लगाएका थिए । मोरङका सिडिओ मदन भुजेलले भदौ २८ गते मेयर फागो, प्रशासकीय अधिकृत रेग्मी सहित अन्यलाई राखेर छलफल गराई सहमति गराएपछि आफू काममा फर्किएको र पुनः घटना दोहोरिएको बताए ।