शिवजन माध्यमिक विद्यालय सितलपाटीमा अध्ययनरत दृष्टिविहीन बालिबालिकाहरूका लागि छुट्टै कक्षा कोठा नहुँदा पठनपाठनमा समस्या भएको दृष्टिविहीन बालबालिकाहरूले गुनासो गरेका छन् । दृष्टिविहीन विद्यार्थी र अन्य विद्यार्थीलाई एउटै कक्षाकोठामा राखी पढाउँदा दृष्टिविहीन बालबालिकालाई पढन समस्या भएको हो ।
‘सरहरूले सपाङ्ग विद्यार्थी सरह हामीलाई पनि एउटै कोठामा बसालेर पढाउँदा समस्या भएको छ ।’-कक्षा ९ मा अध्ययनरत दृष्टिविहीन सन्तोष पुनले गुनासो गरे । उनले आफूलाई अन्य विद्यार्थी सरह सरहरूले हृवाइट बोर्डमा लेखिदिने गरेको र आफूलाई बुझन गाह्रो भएको बताउँदै सुनेका भरमा मात्रै पढ्नुपरेको बताए ।
सरहरूले बोर्डमा लेखिरहँदा आफूहरू हात बाधेर बस्नु पर्ने बाध्यता रहेको कक्षा ८ मा अध्ययनरत दृष्टिविहीन सविना वुढाथोकीले बताइन् । उनले भनिन्-‘सरहरूले बोल्ने भन्दा बढि लेखाउने कार्य गर्नु हुन्छ । हामीलाई खासै ध्यान दिईँदैन ।’
दृष्टिविहीन बालबालिकाहरूले कम्प्यूटरको माध्यमबाट पढाउनका लागि विद्यालय प्राशसनलाई आग्रह गर्दापनि सुनुवाइ नभएको दृष्टिविहीन शिक्षक राजेश अर्यालले बताए । ‘हामीले विद्यालय प्रशासनलाई दृष्टिविहीन विद्यार्थी र अन्य विद्यार्थीलाई एउटै कक्षामा पढाउन सकिँदैन । त्यसको लागि छुट्टै कक्षा कोठा र कम्प्यूटरको व्यवस्था गर्न आग्रह गर्दै आइरहेका छौँ । तर, विद्यालय प्रशासनले अहिलेसम्म जबाफ दिएको छैन ।’-उनले भने ।
यसैबिच सल्यानको एकमात्र दृष्टिविहीन बालबालिकाको छात्राबास जीर्ण हुँदा बालबालिकाहरू जोखिममा रहेको दृष्टिविहीन शिक्षक अर्यालले बताए । भवन पूर्ण रूपमा जीर्ण भइसकेकोले अन्य विकल्प नहुँदासम्म वाध्यताले भवनमा बस्नु परेको उनले बताए ।
उनले भने-‘राज्यले प्रतिव्यक्ति ४ हजार रुपियाँका दरले मासिक छात्रवृत्ति उपलव्ध गराउँछ । त्यो रकमबाट मासिक ५ सय रुपियाँ मात्र विद्यार्थीको खातामा जम्मा हुने गरेको छ । बाँकी बचेको रकमले ब्रेललिपी, कापी र खाना व्यहोर्नु पर्छ ।’
छात्राबासमा हाल ५ जना छात्र र १४ जना छात्रा गरी १९ जना दृष्टिविहीन बालबालिकाहरू अध्ययन गरिरहेका छन् । छात्राबासमा उनीहरूलाई ब्रेललिपीमा अक्षरहरू चिनाइसकेपछि शिवजन माध्यमिक विद्यालयमा अध्ययन गर्ने गरेका छन् ।