बलात्कारपछि हत्या गरिएको भनिएकी १६ वर्षीया इनिसा विकको घटनाका चार जना आरोपितहरुलाई जिल्ला अदालत सुर्खेतले बाल सुधार गृह पठाउने आदेश दिएको छ । चैत १७ गते अदालतका न्यायाधीस दीपक ढकालको इजलासले आरोपित बालकहरुलाई बाल सुधार गृह पठाउने आदेश दिएको जिल्ला अदालत सुर्खेतका सूचना अधिबारी उज्ज्वलदेव राववले जानकारी दिनुभयो । ‘चारै जनाविरुद्ध जबरजस्ती करणी र ज्यान मार्ने उद्योगमा अभियोगपत्र दायर भएको थियो । घटनाको गम्भीरता र प्रारम्भिक प्रमाणका आधारमा अनुसन्धान पूरा नहुँदासम्म बाल सुधार गृहमै राखेर मुद्दा अघि बढाउने आदेश भएको छ,’सूचना अधिकारी उज्वल रावलले भन्नुभयो । अदालतमा चैत १६ गतेदेखि थुनछेक बहस चलेको थियो । चैत १७ गते पनि साढे आठ बजेसम्म पीडत पक्षका आफन्तहरु अदालतको गेटमै धर्ना बसेका थिए । अदालतको आदेश आएसँगै उनीहरु स्वागत गरेका छन् ।
प्रहरीले चैत ११ गते जिल्ला सरकारी वकिलको कार्यालयमा अनुसन्धान प्रतिवेदन बुझाएको थियो । सरकारी वकिलको कार्यालयले आइतबार जिल्ला अदालत सुर्खेतमा अभियोग पत्र दर्ता गराएको थियो ।
गुर्भाकोट नगरपालिका–६ बडाखोली स्थायी घर भएकी इनिसा हाल वीरेन्द्रनगर नगरपालिका–१ मा परिवारका साथ बस्दै आएकी थिइन् ।
फागुन २३ गते शनिवार बिहान ६ बजे नै प्रयोगात्मक कक्षामा जाने भन्दै घरबाट निस्किएकी उनी बिहान ९ बजेतिर वीरेन्द्रनगर नगरपालिका–४ को उत्तरतर्फ पर्ने जनजागरण सामुदायिक वनमा अचेत अवस्थामा भेटिएकी थिइन् । प्रहरीले उनलाई प्रदेश अस्पताल पुर्याउँदा चिकित्सकले मृत घोषणा गरेका थिए । सोही दिन प्रहरीले घटनास्थलबाट नै एक १६ वर्षे बालकलाई घटनास्थलबाटै नियन्त्रणमा लिएको थियो, जसले इनिसाको प्रेमी भएको बयान दिएका थिए । सामूहिक बलात्कारपछि हत्या भएको भन्दै मृतकका आफन्तहरूले फागुन २४ गते जिल्ला प्रहरी कार्यालय सुर्खेतमा उजुरी दिएका थिए । सोही उजुरीका आधारमा फागुन २५ गते शवको पोष्टमार्टम प्रदेश अस्पताल सुर्खेतमा भएको थियो ।
मुख्य आरोपित भनिएका बालकले आफूले अन्य साथीहरुलाई सहयोगका लागि बोलाएको बयानमा भनेका थिए । त्यस्तै १५, १६ र १७ वर्षीय तीन बालकलाई २४ गते प्रहरीले गिरफ्तार गरेर अनुसन्धान गरेको थियो ।
घटनाको अनुसन्धान प्रतिवेदन सरकारी वकिल कार्यालयमा पेस गरेको प्रहरीले भने सामूहिक नभएर एकल करणी भएको निष्कर्ष निकालेको थियो । यद्यपि, सरकारी वकिल कार्यालयले आइतबार जिल्ला अदालतमा दायर गरिएको अभियोग पत्रमा भने सामूहिक बलात्कार भएको दाबी गरिएको थियो ।
२४ दिनसम्म उठेन शव
इनिसा विकको शव २४ दिनसम्म पनि उठ्न सकेको छैन । उनको शव अझै प्रदेश अस्पतालको शवगृहमा राखिएको छ । शवको सद्गत बारे परिवारले अझै निर्णय गरेको छैन ।
मृतक इनिसाकी आमा तिला विकले छोरीको हत्यामा संलग्नहरुलाई अदालतले गरेको आदेशको सम्मान गर्दै आगामी दिनमा पनि सत्य, तथ्य र निष्पक्ष न्यायको आसा गरेको बताइन् । घटनाबारे केन्द्रीय अनुसन्धान ब्युरो (सीआईबी)सहित नेपाल प्रहरीका चार टोलीले अनुसन्धान गरिसकेको छ । फागुन २७ गते उक्त टोली सुर्खेतमा आएको थियो ।