जिल्लाको हिमाली क्षेत्रमा पर्ने साइपाल गाउँपालिका–३ स्थित काँडा माध्यामिक विद्यालयको भवनको छाना हावाहुरी सहितको वर्षाले उडाएको भए पनि मर्मत हुँन नसक्दा पठनपाठन प्रभावित भएको छ ।
०८२ माघ ९ गते राति आएको भीषण हावाहुरी र पानीका कारण विद्यालयको छाना पूर्ण रूपमा क्षतिग्रस्त भएको र विद्यालय भवनको छाना उडाउदा करिब ६ लाख रुपियाँ बराबरको क्षति भएको विद्यालय प्रशासनले जनाएको छ ।
भवन क्षतिग्रस्त भएपछि कक्षाकोठाको अभाव भएका कारण विद्यार्थीलाई नियमित पठनपाठन गराउन कठिनाइ भइरहेको विद्यालयका प्रधानाध्यापक रमेश जेठाराले बताउनु भयो । उहाँले भन्नुभयो, ‘छाना उडेपछि कक्षाकोठा प्रयोग गर्न नमिल्ने अवस्था छ । विद्यार्थी र शिक्षक दुवैलाई समस्या भएको छ ।’
विद्यालयका शिक्षक उज्वल बोहराले क्षतिको विवरण संकलन गरी प्रहरी कार्यालयमा बुझाइसकेको जानकारी दिनुभएको छ । विद्यालयको पुनर्निर्माणका लागि स्थानीय सरकारसँग सहयोगको माग गरिएको उहाँले बताउनु भयो ।
हावाहुरीका कारण विद्यालय भवन क्षतिग्रस्त भएको र हिमपातले गर्दा अत्याधिक चिसो बढेकोले पठनपाठनमा थप समस्या उत्पन्न भएको कक्षा ९ मा अध्ययनरत विद्यार्थी विकास गुरुङले बताउनुभयो ।
१२ कक्षासम्म सञ्चालनमा रहेको यस विद्यालयमा २ सय ७० जना छात्रछात्राहरु अध्ययनरत छन् ।