१८ वर्षीया युवतीलाई ललाईफकाई भारतमा लेगेर बेचेको कसुरमा दुप्चेश्वर गाउँपालिका–३ राउतवेसीका २८ वर्षीय कृष्णबहादुर तामाङलाई जिल्ला अदालत नुवाकोटले २० वर्षको कैद सजाय सुनाएको छ ।
न्यायाधीश ऋषिकेश वाग्लेको इजलासले आरोपितलाई दोषी ठहर गर्दै पुस २९ गते २० वर्षको कैद सजायको फैसला गरेको हो ।
०७१ कात्तिक १९ गते नुवाकोटबाट हराएकी युवतीको परिवारले जिल्ला प्रहरी कार्यालयमा ०७१ कात्तिक २० गते आरोपितविरूद्ध उजुरी दिएका थिए ।
फरार रहेका आरोपितलाई काठमाडौँबाट ०७३ मङ्सिर १७ गते गिरफ्तार गरी नुवाकोट ल्याएर अनुसन्धान थालेको थियो ।
पीडित युवतीलाई भारतीय प्रहरीले उद्धार गरी ०७३ सालमा नेपाल फर्काएको नुवाकोट प्रहरीले जनाएको छ ।