गत हप्ता परेको बेमौसमी वर्षाका कारण लुम्बिनी प्रदेशमा लगाइएको धानबाली मध्ये १३ करोड ४३ लाख मूल्य बराबरको धानबालीमा पूर्ण क्षति भएको छ ।
उक्त वर्षाले प्रदेशका १२ जिल्ला मध्ये सात जिल्लाको ८ सय ९६ हेक्टरको ३ हजार ८ सय ९७.६८ मेट्रिक टन धानबाली पूर्णरुपमा क्षति भएको हो ।
३ हजार ४ सय ६३ रुपैयां ८१ पैसा प्रति क्वीन्टल समर्थन मूल्य र ४.३३ मेट्रिक टन प्रति हेक्टर उत्पादकत्वका आधारमा यो क्षति भएको प्रदेश कृषि विकास निर्देशनालयका सूचना अधिकारी वरिष्ठ बाली संरक्षण अधिकृत मिलन गैरेले बताउनुभयो ।
यो वर्ष लुम्बिनी प्रदेशमा २ लाख ९८ हजार १० हेक्टरमा धान रोपिएकोमा प्रारम्भिक रुपमा संकलन भएको विवरण अनुसार कूल बालीको ०.३० प्रतिशत धान पूर्णरुपमा क्षति भएको अधिकृत गैरेले बताउनुभयो ।
प्रदेश निर्देशनालयका अनुसार सबैभन्दा बढी रुपन्देहीको २ सय ४० हेक्टर र सबैभन्दा कम बर्दियामा ५ हेक्टरको धानबाली पूर्ण क्षति भएको छ । बढी क्षति हुने जिल्ला मध्ये दोस्रोमा गुल्मीको २ सय २२ हेक्टर, तेस्रोमा नवलपरासी पश्चिमको २ सय एक हेक्टर र चौथोमा कपिलवस्तुको १ सय ४४ हेक्टरको धानबाली पूर्णरुपमा क्षति भएको छ ।
त्यसै गरी अर्घाखाँचीमा ५३ हेक्टर र पाल्पामा ३२ हेक्टर खेतको धान बालीमा पूर्ण क्षति भएको छ । प्रदेश कृषि विकास निर्देशनालयले जनाएको छ ।
‘प्रतिशतमा हेर्दा थोरै भएपनि किसानको व्यक्तिगत धान खेतीको हिसाब गर्दा किसानका लागि यो ठूलै क्षति हो’– निर्देशनालयका प्रमुख रामप्रसाद पाण्डेले भन्नुहुन्छ–‘यो प्रारम्भिक विवरण हो, अब प्रदेशका पालिका र किसान समेतको यकिन तथ्यांक केही दिनमा आउंछ ।’ प्रदेशमा १ लाख ६९ हजार ३ सय १५ हेक्टर अर्थात ५६.८२ प्रतिशत धानबाली विना क्षति थन्काइएको र एक लाख २१ हजार २ सय १५ हेक्टर अर्थात ४०.६७ प्रतिशत धान काट्न बाँकी रहेको निर्देशनालयका वरिष्ठ बाली संरक्षण अधिकृत मिलन गैरेले बताउनुभयो । काटेर खेतमा राखेको मध्ये ७ हजार २ सय ५० हेक्टर अर्थात २.४३ प्रतिशत धानबाली भिजेको अधिकृत गैरेले बताउनुभयो ।
प्रदेशका दाङ, बाँके, रोल्पा, प्युठान र रुकुम पुर्वमा धान बालीमा हालसम्म क्षति नभएको निर्देशनालयले जनाएको छ ।