इन्सेक रुकुम पश्चिम प्रतिनिधि जीवन खड्काका अनुसार रुकुम पश्चिम कारागारबाट ८८ जना कैदीबन्दीहरु ०८२ भदौ २४ गते साँझ ६ बजे ढोका फोडेर भागेका छन् । भागेका ४२ जना कैदीबन्दीलाई २४ गते नै र तीन जनालाई भदौ २५ गते बिहान मुसिकोट नगरपालिकाबाट प्रहरीले गिरफ्तार गरेको छ ।
जिल्ला प्रहरी कार्यालय रुकुम पश्चिमका सूचना अधिकारी इन्स्पेक्टर हरिबहादुर पुनले ढोका फोडेर भागेका ८८ जना कैदीबन्दी मध्ये ४५ जनालाई गिरफ्तार गरिसकेको बताउनु भयो । ‘ढोका फोडेर भागेको थाहा पाएपछि ४५ जनालाई नियन्त्रणमा लिन सफल भएका छौं,’ इन्स्पेक्टर पुनले भन्नुभयो, ‘बाँकी ४३ जनाको पनि तिब्र खोजी भइरहेको छ ।’ उहाँले नेपाल प्रहरी र सशस्त्र प्रहरीले भागेकाहरुको खोजी गरिरहेको बताउनु भयो रुकुम पश्चिम कारागारमा भदौ २४ गतेसम्म १ सय ५८ जना कैदीबन्दी रहेका थिए ।
इन्सेक जुम्ला प्रतिनिधि मानदत्त रावलका अनुसार जिल्ला कारागारबाट भदौ २४ गते राति ११ बजे ३६ जना कैदीबन्दी भागेका छन् । कारागार भित्रका हतियार र दाउराको प्रयोग गरी ढोका फोडेर भागेका मध्ये दुई जनालाई प्रहरीले भदौ २५ गते गिरफ्तार गरेको छ । ३४ जना फरार कैदीबन्दीको खोजी कार्य तिब्र रहेको जिल्ला प्रहरी कार्यालय जुम्लाका प्रमुख रबिन डिएसपी बाबु रेग्मीले बताउनु भयो । जेनजी आन्दोलनको मौका छोपी डिउटीमा रहेका प्रहरी र कारागार प्रशासकमाथि हातपात गर्दै कैदीबन्दी भागेका थिए । जुम्ला कारागारमा भदौ २४ गतेसम्म पाँच जना महिला र ९२ जना पुरुषसहित ९७ जना कैदी बन्दी रहेका थिए ।
इन्सेक डोल्पा प्रतिनिधि विष्णु देवकोटाका अनुसार डोल्पा कारागारमा भदौ २५ गते दिउँसो कैदीबन्दीले दुई ओटा सिलिण्डर पड्काएर भाग्ने प्रयास गरेका छन् । तत्कालै नेपाली सेना, सशस्त्र प्रहरी र नेपाल प्रहरीले उनीहरुलाई रोकेको छ। उनीहरुले केही समयसम्म आफूहरुको रिहाईको माग गर्दै नाराबाजी समेत गरेका थिए । कारागारको सुरक्षा नेपाली सेना, सशस्त्र प्रहरी र नेपाल प्रहरीले संयुक्त रुपमा गरेका छन् ।
कर्णालीका अन्य जिल्लाका कारागारहरु शान्तिपूर्ण रहेको इन्सेक प्रतिनिधिहरुले जानकारी दिएका छन् ।