छायाँनाथ रारा नगरपालिका–१० चराप गाउँमा ०८२ साउन ११ गतेदेखि १४ गतेसम्म परेको अविरल वर्षाका कारण घर भत्किदा नौ घरपरिवार बिचल्लिमा परेका छन् । वर्षाले चार घर पूर्ण र पाँच घर आंशिक क्षति हुँदा उनीहरु छिमेकीहरूको घरमा आश्रय लिन बाध्य भएपनि राज्यबाट राहत पाउन नसकेको पीडित सिर्जना बढुवालले गुनासो गर्नुभयो ।
‘अहिलेसम्म कुनै पनि निकायले राहत दिएका छैनन् । घर सबै भत्किए । अहिले छिमेकीको घरमा आश्रय लिनु पर्ने बाध्यता भएको छ,’ उहाँले भन्नुभयो, ‘सरकारले त्रिपालसम्म उपलब्ध गराएको छैन । खाने अन्न र भाँडाकुँडा सबै पुरिएका छन् । घर भत्किएको सात दिन भइसक्दा पनि मुचुल्का गर्न प्रहरी बाहेक कोही नआएको पीडितहरुको गुनासो गरेका छन् ।
जिल्ला विपद् व्यवस्थापन समितिका संयोजक तथा प्रमुख जिल्ला अधिकारी कमल प्रसाद पाण्डेले राहत उपलब्ध गराउन ढिलाइ भएको स्वीकार गर्नुभयो । उहाँका अनुसार ‘स्थानीय तह राहत कार्यविधि २०८१’ अनुसार पालिकाले तत्काल राहत उपलब्ध गराई जिल्ला विपद् व्यवस्थापन समितिमा अनुमोदन गराउनुपर्ने प्रावधान अनुसार तत्काल छायाँनाथ रारा नगरपालिकाले राहत उपलब्ध गराउनुपर्ने बताउनु भयो । जिल्ला प्रहरी कार्यालयका अनुसार छायाँनाथ रारा नगरपालिका—१० चराप गाउँका शेर बहादुर ऐडी, दन्ता ऐडी, भिम बहादुर बढुवाल र सृजना ऐडीका घर पूर्ण क्षती भएका छन् । उनीहरुका घरसँग जोडिएका हरिचन्द्र ऐडी, उनरुपा बढुवाल, दल बहादुर बढुवाल, राजेन्द्र ऐडी र दल बहादुर ऐडीका घर आंशिक क्षति भएका छन् ।