इलाका प्रहरी कार्यालय, सबैलाको हिरासत कक्षको शौचालयमा जेठ २७ गते राति झुन्डिरहेको अवस्थामा फेला परेका २२ वर्षीय शम्भु सदाको शवको पोस्टमार्टम असार २ गते प्रादेशिक अस्पताल, जनकपुरधाममा गरिएको छ ।
शवको पोस्टमार्टम गरिएको भए पनि पीडित परिवारले शव बुझेका छैनन् । असार ३ गते अस्पतालबाट शव बुझेर सबैला नगर परिक्रमा गराइ दाहसंस्कार गरिने सङ्घर्ष समितिका संयोजक चन्देश्वर सदाले बताउनुभयो ।
प्रहरी हिरासतमा शम्भुको हत्या भएको भन्दै न्यायिक छानबिन समिति गठन गरी घटनाको सत्यतथ्य पत्ता लगाउन माग गर्दै पीडित परिवार आन्दोलनरत थियो ।
धनुषाका प्रमुख जिल्ला अधिकारी कोषहरि निरौलाको अध्यक्षतामा पीडित परिवार, सङ्घर्ष समितिका पदाधिकारीबीच असार २ गते भएको बैठकमा तीन बुँदे सहमति भएको छ ।
घटनाको छानबिनका लागि जिल्ला प्रशासन कार्यालय धनुषाका अधिकृत गणेश मिश्रको संयोजकत्वमा एक छानबिन समिति गठन गर्ने सहमति भएको छ ।
समितिमा एक जना मानव अधिकारकर्मी र एकजना कानुन व्यवसायी आमन्त्रित सदस्यकारूपमा रहने छन् । यसैगरी, पीडित परिवारलाई राहतका लागि प्रशासन कार्यालय, धनुषाले यथाशीघ्र पहल गर्ने र पीडित परिवारको शान्ति सुरक्षाको उचित प्रबन्ध जिल्ला प्रशासन कार्यालय, धनुषाले गर्ने सहमतिपत्रमा उल्लेख छ ।