नेत्रविक्रम चन्द विप्लव नेतृत्वको नेकपाका नौ जना कार्यकर्तालाई चैत १५ गते रिहा गर्दा जिल्ला अदालतले इन्सेक जिल्ला प्रतिनिधिलाई जिम्मा लगाएको छ ।
राज्यविरुद्धको अपराध गरेको आरोपमा गत फागुन १७ गते चौतारा सागाचोकगढी नपा १० स्थित कार्कीटारबाट गिरफ्तार गरिएका उनीहरुलाई जिल्ला अदालतले चैत १३ गते धरौटीमा रिहा गर्ने आदेश गरेको थियो ।
धरौटी रकम बुझाउन नसकेपछि १३ गते नै अदालतले उनीहरुलाई कारागार चलान गरेको थियो । धरौटी रकम चैत १५ गते बुझाएपछि अदालतले इन्सेक प्रतिनिधिको जिम्मामा रिहा गरेको हो ।
अदालतको आदेशले धरौटी रकम बुझाएर रिहा हुनेहरुमा रामेछाप जिल्ला खाडादेवी गाउँपालिका ९ का सुजन भन्ने हिरा घिसिङ, उदयपुर जिल्ला केउरिनी नपा-९ का शिव बिक, कालिकोट जिल्ला सान्नेत्रिवेणी गाउँपालिका-९ का नवराज केसी, काभ्रे जिल्ला भुम्लु गाउँपालिका-३ का कविराम भन्ने सञ्जिव पहरी, कालिकोट जिल्ला खडाचक्र नपा-४ का अनिल बिक, कैलाली जिल्ला लम्की चुहा नपा-९ का देउराम लोहार, इलाम जिल्ला इलाम नपा-७ का सागर राई, मकवानपुर जिल्ला मनहरा गाउँपालिका-२ का चन्द्रबहादुर मोक्तान र चितवन जिल्ला राप्ती नपा-१२ का साजन भन्ने आशिष महतो रहेका छन् ।
इन्सेक जिल्ला प्रतिनिधि नातिबावु धितालले जिल्ला अदालतबाट जिम्मा लिएर चौतारास्थित बीच बजारमा पुर्याई सुरक्षित स्थानतर्फ पठाएको बताए ।