कात्तिक १४ गते बुहारी हराएपछि खोज्न गएकी दोगडाकेदार गाउँपालिका–४ की ५२ वर्षीया पार्वती भट्ट ‘बेपत्ता’ छिन् भने उनकी बुहारी ३० वर्षीया निर्मला भट्ट मृत अवस्थामा फेला परेकी छिन् ।
१४ गते घाँस काट्न भन्दै घरबाट निस्केकी निर्मला साँझसम्म पनि नफर्केपछि उनलाई खोज्न गएकी पार्वती सम्पर्कविहीन भएको खोचलेक प्रहरी चौकीका असई श्यामसिंह महराले जानकारी दिए ।
दुवैजना रातिसम्म पनि घर नफर्किएपछि घर परिवारका अन्य सदस्यले खोजतलास गर्दा निर्मला कात्तिक १५ गते बिहान स्थानीय ओडीगाउँ जङ्गलमा झुण्डिएको अवस्थामा मृत फेला परेकी हुन् ।
बेपत्ता पार्वतीको खोजीका लागि प्रहरी चौकी खोचलेकबाट असई महराको नेतृत्वमा टोली परिचालन गरिएको छ ।
घटना रहस्यमय रहेकाले थप अनुसन्धानका लागि इलाका प्रहरी कार्यालय पाटनका इञ्चार्ज इन्स्पेक्टर राजेन्द्रबहादुर सिंह नेतृत्वको टोलीसमेत अनुसन्धानमा खटाइएको जिल्ला प्रहरी कार्यालय बैतडीका डिएसपी नेत्रमणी गिरीले जानकारी दिए । निर्मलाको शव पोष्टमार्टमका लागि जिल्ला अस्पताल ल्याउने तयारी भइरहेको गिरीले बताए ।