आठ देखि १२ वर्ष उमेर समूहका सात जना विद्यार्थीलाई यौन दुर्व्यवहार गरेको आरोपमा प्रहरीले बेनी नपा–२ बगरफाँटमा रहेको सरस्वती आधारभूत विद्यालयका शिक्षक ५३ वर्षीय यामबहादुर जिसीलाई असोज १३ गते गिरफ्तार गरेको छ ।
पीडित बालिकाहरूलाई आरोपितले यौन दुर्व्यवहार गर्ने गरेको घटना असोज ३ गते सार्वजनिक भएको थियो । यससम्बन्धी समाचार असोज ४ गते इन्सेक अनलाइनमा समेत प्रकाशित थियो ।
असोज ३ गते विद्यालयका शिक्षक, विद्यार्थी, अभिभावक, जनप्रतिनिधिलगायतको सर्वपक्षीय भेलामा आरोपित जिसीले विद्यार्थी माथि दुर्व्यवहार गरेको बारे स्वीकार गरेका थिए । भेलाले आरोपित शिक्षकले बालबालिकामाथि दुर्व्यवहार गरेकाले असोज १३ गतेसम्मको समय सिमा दिएर शिक्षक जिसीलाई अन्य विकल्प खोज्न भनेको थियो । विद्यालय प्रशासनका अनुसार आरोपित शिक्षक जिसीले असोज १२ गते राजिनामा दिइसकेका छन् ।
जिल्ला प्रहरी कार्यालयका डिएसपी बिरबहादुर बुढामगरले सर्वपक्षीय भेलामा सात जना बालिका पीडित भएको भनिएपनि तीनजना बालिका पीडित भएको जानकारी प्रहरीसमक्ष आएको बताए । स्थानीयको असहयोगका कारण आरोपित शिक्षकलाई गिरफ्तार गर्न ढिलाई भएको डिएसपी बुढामगरको आरोप छ ।