दुई जना चिकित्सकको दरबन्दी रहेको प्राथमिक स्वास्थ्य केन्द्र होलेरी तीन महिनादेखि चिकित्सकविहीन हुँदा यस क्षेत्रका विरामी मर्कामा परेका छन् ।
तीन महिना अघिसम्म करार र ओजेटी गरी चार जना डक्टरले सेवा दिइरहेको दक्षिण रोल्पाको एक मात्र ठूलो स्वास्थ्य संस्था एकाएक चिकित्सकविहीन हुँदा बिरामीहरू जिल्ला बाहिर जान बाध्य भएका छन् ।
साथै पोष्टमार्टमका लागि पनि सदरमुकाम वा दाङ पुर्याउनुपर्ने बाध्यता रहेको रुन्टीगढी गाउँपालिका-८ का जनक पुनले गुनासो गरे । डक्टर नहुँदा सामान्य बिरामीलाई पनि रिफर हुने भएकाले घोराही जानुपर्ने बाध्यता रहेको पुनले बताए ।
‘दुई जना डक्टरको सरुवा भयो ।’-रुन्टीगढी गाउँपालिकाका स्वास्थ्य संयोजक गणेश बुढाले भने-‘एक जनाले राजीनामा दिए भने अर्का विदेश गए ।’
धेरै बिरामी आउने ठाउँ भएकाले अहिले रिफर गर्नुको विकल्प नभएको प्राथमिक स्वास्थ्य केन्द्र होलेरीका निमित्त इञ्चार्ज राधा बरालले बताइन् । ‘प्रसूति र सामान्य उपचार सेवा भएतापनि अहेवले बिरामी हेरेको डक्टरले हेरे जस्तो हुँदैन ।’-उनले भनिन् । सबै भन्दा ठूलो समस्या भिडियो एक्सरेको रहेको बरालले बताइन् । ‘भाँचिएको र इञ्जुरीका केस आउँछन् । हामीले छुट्याउन सक्दैनौँ ।’-उनले समस्या सुनाइन् ।
‘डक्टर नबस्ने होलेरीको यो समस्या पुरानै हो ।’-स्थानीय ऋषिराम श्रेष्ठले भने-‘डक्टर बस्न रुचाउँदैनन् वा केन्द्रबाट पठाउन चाहन्नन् ।’ यस विषयमा जानकारी नभएर आफूहरूले सधैँ सास्ती खेप्नु परेको उनको गुनासो छ ।
उता रुन्टीगढी गाउँपालिका अध्यक्ष बालाराम बुढाले भने यस विषयमा जिल्लामा जानकारी गराएकाले तत्काल समस्या समाधान हुने बताए ।