विद्यार्थीलाई कुटपिट गरी मानव मुत्र (पिसाव) खुवाएर यातना दिएको भन्दै रामेछापको लिखु तामाकोसी गाउँपालिका धोवीस्थित झट्टेश्वर माविका प्रधानाध्यापक ४७ वर्षीय केबलबहादुर तिमिल्सिनाविरूद्ध पीडित विद्यार्थीहरूले जेठ ४ गते इलाका प्रहरी कार्यालय धोवीमा उजुरी दिएका छन् ।
गाउँपालिकाका अध्यक्ष गोविन्दबहादुर खड्काका अनुसार लिखु तामाकोसी गाउँपालिका-४ निवासी प्रधानाध्यापक तिमिल्सिनाले कक्षा सातमा अध्ययनरत १३ वर्षीय बुद्ध तामाङ र १४ वर्षीय लाक्पा तामाङलाई जेठ १ गते निर्घात कुटपिट गरी पिसाव पिलाएका थिए ।
प्रधानाध्यापक तिमिल्सिनाले आफूले उत्सृङ्खल गतिविधि गर्ने विद्यार्थीहरूलाई सामान्य कारबाही गरेको बताए । जेठ १ गते कक्षा सातमा अध्ययनरत विद्यार्थीहरू वुद्ध तामाङ, लाक्पा तामाङ र गणेश बुढाथोकी मिलेर आफ्नै साथी साङविर तामाङलाई मिनरल वाटर बोतलमा पिसाव र थुक मिसाएर खुवाएको विद्यालय प्रशासनमा खबर आएपछि कारबाही स्वरुप खुवाउने विद्यार्थीहरूलाई पनि त्यहि ‘पानी’ पिउन दिएको र खान नमानेपछि पाइपको टुक्राले सामान्य कुटपिट गरेको प्रधानाध्यापक तिमिल्सिनाले बताए ।
कारबाहीको क्रममा बोतलको पानी वुद्ध तामाङ र लाक्पा तामाङले पिएको र गणेश बुढाथोकीले पिउन नमानेपछि मात्र उक्त बोतलमा पिसाव नै भएको विद्यार्थीले स्वीकारेको उनले बताए ।
प्रधानाध्यापक तिमिल्सिनाले कक्षा नौमा अध्ययनरत ममिता तामाङलाई जेठ २ गते आफ्नै साथीसँग झगडा गरेको भन्दै निर्घात कुटपिट गरेको आरोप छ । विद्यार्थी ममिता तामाङ गाँजा खाएर विद्यालय पढ्न आउने र साथीहरूसँग झैझगडा मात्र गर्ने गरेको भन्दै कपाल समातेर गालामा पाँच थप्पड हानेको प्रधानाध्यापक तिमिल्सिनाले स्वीकार गरेका छन् ।
विद्यालय व्यवस्थापन समितिले जेठ ४ गते छलफलका लागि बैठक डाकेको र प्रधानध्यापक बैठकमा नआएपछि बहुमतको आधारमा विद्यालय शिक्षकहरूको सहभागितामै प्रधानाध्यापक पदबाट हटाइएको गाउँपालिकाका अध्यक्ष खड्काले जानकारी दिए । उनका अनुसार अब प्रहरी प्रशासनमा संयुक्त उजुरी दिने र आवश्यक कारबाहीका लागि सिफारिस गरिने बताए ।
प्रधानाध्यापक तिमिल्सिनाले आफुलाई विद्यालय ब्यवस्थापन समितिको बैठकको बारेमा केही थाहा नभएको र गाउँपालिकाका अध्यक्ष र वडा अध्यक्षसँग राम्रो सम्बन्ध नरहेकै कारण घटनालाई तोडमोड गरेर आफूलाई हटाउन खोजेको आरोप लगाए । यस घटनालाई छानबिन गर्न आजै विद्यालय निरीक्षकको संयोजकत्वमा छानबिन समिति गठन गरिएको छ ।