अनौपचारिक सेवा केन्द्र (इन्सेक) कर्णाली प्रदेश कार्यालय, सुर्खेतद्वारा सञ्चालित मानव अधिकार शिक्षा परियोजना अन्तरगत दुल्लू नगरपालिकामा गठित मानव अधिकार समूहले वैशाख १६ गते दुल्लू नगरपालिका-९ को वडा कार्यलयलाई विद्यालयमा शैक्षिक सुधारका माग राखी ध्यानाकर्षण पत्र बुझाएको छ ।
विद्यालयहरुमा कम्प्यूटर प्रयोगमा नआएको र कम्प्यूटर शिक्षक नभएको, विद्यालयहरुमा व्यवस्थित सौचालय नभएको वडा स्तरका विद्यालयहरुमा अध्ययनरत बालबालिकाहरु शिक्षा तथा स्वास्थ्य सेवाबाट बञ्चित भएको ध्यानाकर्षण पत्रमा औल्याइएको छ ।
ध्यानाकर्षणपत्र बुझाउन मानव अधिकार समूहका अध्यक्ष दुर्गे नेपाली, सदस्यहरु सुशिला योगी, टेकबहादुर सुजी, अञ्जु दाहाल समेत वडा कार्यालय पुग्नुभएको मानव अधिकार शिक्षा परियोजना जिल्ला सहजकर्ता कलमबहादुर नेपालीको जानकारी दिनुभयो ।
दुल्लू नगरपालिका–९ का वडाध्यक्ष तिलकप्रसाद उपाध्यायले ध्यानाकर्षण पत्र ग्रहण गर्दै मानव अधिकार समूहले औंल्याएको समस्या समाधानका लागि तत्काल पहल गरी विद्यालयहरुमा शैक्षिक क्रियाकलापहरु व्यवस्थित गराउने प्रतिवद्धता जनाउनुभयो ।
