परियोजना परिचयात्मक तथा युवा मानव अधिकार रक्षक सञ्जाल गठनका लागि जिल्ला स्तरीय सरोकारवालाहरूसँग छलफल कार्यक्रम सम्पन्न भएको छ । रोयम नेपालको आयोजना, (AEIN) को आर्थिक सहयोग तथा अनौपचारिक क्षेत्र सेवा केन्द्र (इन्सेक) को समन्वयमा ०८१ कात्तिक ६ गते कार्यक्रम सम्पन्न भएको हो ।
राष्ट्रिय सभाका सदस्य सावित्री मल्लले नागरिकहरूको अधिकार प्रत्याभूति गराउन स्थानीय सरकारको सक्रियता जरुरी रहेको बताउनु भयो । नगरपालिकामा उपमेयर र गाउँपालिकामा उपाध्यक्ष संयोजक रहेको न्यायिक समितिको प्रभावकारी रूपमा सञ्चालन गर्न, स्थानीय तहले नीति योजना र बजेट विनियोजनमा आवश्यकता आधारमा छनौट गर्न, लक्षित वर्गका बजेट कार्यक्रम बनाउन, योजनाहरूको प्रभावकारी अनुगमन तथा मूल्याङ्कन गर्न उहाँले आग्रह गर्नुभयो ।
कार्यक्रममा जिल्ला समन्वय समितिका उपप्रमुख केशव शाहीले स्थानीय सरकार उदार हुनुपर्ने र अधिकार माग्ने पक्षहरूको क्रियाशिलता आवश्यकता रहेको उल्लेख गर्नुभयो । आठबीस नगरपालिकाका प्रमुख तर्कबहादुर बडुवालले पिछडिएको क्षेत्रमा राज्यका निकायहरूले पक्षपात गरिरहेको दुखेसो पोख्नुभयो ।
डुङ्गेश्वर गाउँपालिकाका अध्यक्ष सुन्दरकुमार केसीले युवा लगनशिलता र तत्परताले अवसरहरू प्राप्त हुने बताउनु भयो । त्यसबखत गुराँस गाउँपालिकाका अध्यक्ष टोपबहादुर बीसीले अधिकार अभिमुखीकरण गर्नेहरूले नागरिकहरूलाई कर्तब्य पालनाको शिक्षा पनि दिनुपर्ने सुझाव दिनुभयो ।
गैसस महासङ्घका अध्यक्ष डिलकुमारी चन्दको अध्यक्षतामा भएको अन्तरक्रिया कार्यक्रममा इन्सेक प्रतिनिधिले मानव अधिकारको अवस्था र मानव अधिकार रक्षकहरूको सुरक्षा सवाल तथा पैरवी रणनीति विषयमा सहजीकरण गर्नुभएको रोयम नेपालका परियोजना संयोजक सन्तोष विकले जानकारी दिनुभयो ।
अन्तरक्रियामा उठेका सवालहरू बारे स्थानीय सरकारहरूले आगामी बजेट तथा नीति कार्यक्रमहरूमा सम्बोधन गर्ने गरी पाँच बुँदे प्रतिबद्धता जनाइएको छ । मानव अधिकार प्रवर्द्धन तथा संरक्षण गर्ने, बजेट तथा कार्यक्रम निर्माण गर्ने, मानव अधिकार हनन् तथा ज्यादतीका घटनाहरू अभिलेखीकण गर्ने, मानव अधिकार रक्षकहरूको सुरक्षा लगायतका सवालहरूमा जनप्रतिनिधिहरूले प्रतिबद्धता जनाउनु भएको छ ।
रोयम नेपालले मानव अधिकार शिक्षा प्रवर्द्धन र युवा अधिकारको पैरवी गर्न एइआइएनको सहयोगमा कर्णाली प्रदेशका १० ओटै जिल्लामा सन् २०२४ देखि तीन वर्षका लागि मानव अधिकार तथा सामाजिक न्याय अभियान एकता परियोजना सञ्चालन गरेको छ ।
