नेपाल मानव अधिकार वर्ष पुस्तक २०२४ का लागि सङ्कलन गरिएका मानव अधिकारसँग सम्बन्धित घटनाहरूको प्रकाशनपूर्व वार्षिक समीक्षा कार्यक्रम पुस १ गते वीरेन्द्रनगरमा सम्पन्न भएको छ ।
कार्यक्रममा प्रमुख जिल्ला अधिकारी नारायणप्रसाद सापकोटाले इन्सेकले सङ्कलन गरेका घटनाहरु तथ्यपरक रहेको भन्दै फरक प्रकृतिका घटनाहरु समेत समावेश गर्नुपर्ने सुझाव दिनुभयो ।
उहाँले मानव अधिकार स्वतन्त्रहुनुपर्ने भन्दै प्रशासनले नागरिकको जीउधन, स्वतन्त्रता र अधिकारलाई ध्यानमा राखेको बताउनुभयो ।
त्यस्तै जिल्ला सरकारी वकिलको कार्यालयका प्रमुख नविन भट्टले मानव अधिकारको क्षेत्रमा इन्सेकको महत्वपुर्ण भूमिका रहेको भन्दै घटनाहरु थपघट गर्नुपर्ने बताउनुभयो । जिल्ला अदालतका तहसिलदार मोतिप्रसाद देवकोटाले मानव अधिकार उल्लङ्घनका घटनामा विभिन्न स्वरुपहरु बदलिएको भन्दै अदालतमा भएका थप घटनाहरुको दस्तावेज गर्न इन्सेकलाई सहयोग गर्ने प्रतिबद्धता व्यक्त गर्नुभयो ।
त्यस्तै गरी जिल्ला प्रहरी कार्यालयका वरिष्ठ सई दिपेन्द्र केसीले इन्सेकले प्रकाशन गर्ने मानव अधिकार वर्ष पुस्तकले समाजमा मानव अधिकार संस्कृतिको विकास हुनुका साथै सामाजिक विकासमा टेवा पुग्ने बताउनुभयो । मानव अधिकार रक्षक सञ्जालका कर्णाली प्रदेश संयोजक पीताम्बर ढकालले मानव अधिकारको संरक्षण सम्द्र्धन गर्ने राज्यको दायित्व भएपनि इन्सेक जस्ता मानव अधिकारको क्षेत्रमा कामगर्ने सस्थाहरुले महत्वपूर्ण काम गरिरहेको बताउनुभयो ।
अधिवक्ता गिता कोइरालाले विभिन्न प्रकारका घटनालाई पनि मानव अधिकारसँग तुलना गरेर पुस्तकमा समावेश गर्नुपर्नेमा जोड दिनुभयो ।
इन्सेक जिल्ला प्रतिनिधि जगतदल जनाला विकले सन् २०२३ जानवरी १ देखि डिसेम्वर १६ सम्म सङ्कलन गरिएका ९८ ओटा घटना प्रस्तुत गर्नुभएको थियो । प्रस्तुत गरेको प्रतिवेदनमा घरेलु हिसांका ५८,बलात्कारका १४,कुटपिट दुव्र्यहा धम्की ७,विद्यालय सजायका १, आत्महत्या दुरुत्साहन १, बालविवाह १, बाललको होस्टेलमा मृत्यु १, बाल अधिकार बलात्कारका १२ र हत्याका २ घटना रहेका छन ।
इन्सेक कर्णाली प्रदेश कार्यालयका संयोजक नारायण सुवेदीले छुटेका घटनाहरुलाई सम्बन्धित निकायसँग समन्वय गरी पुस्तकमा समेटिने बताउनुभयो ।
कार्यक्रममा नेपालबार एसोसिएसन सुर्खेत, उच्च बार सुर्खेत, फियान नेपाल, राष्ट्रिय अपाङग महासंघ नेपाल ,आवाज र पत्रकार महासंघका पदाधिकारीहरुको समेत सहभागिता रहेको थियो ।
