मिथिला नगरपालिकाकी उपमेयर ताराकुमारी बस्नेत लामाले मानव अधिकारको रक्षाका लागि अनौपचारिक क्षेत्र सेवा केन्द्र (इन्सेक) को साथ पाउनु गौरवको कुरा भएको बताउनु भएको छ ।
इन्सेक प्रदेश २ कार्यालय जनकपुरधामले मङ्सिर ८ गते ‘स्थानीय समुदायलाई सचेत पार्दै जिम्मेवार निकायलाई जबाफदेही बनाउने’ (इएलपी) परियोजनाको परिचयात्मक कार्यक्रममा उहाँले सो कुरा बताउनु भएको हो ।
मिथिला नगरपालिकाकी उपमेयर बस्नेतले मानव अधिकारको रक्षाका लागि इन्सेकको साथ पाउनु गौरवको कुरा भएको बताउँदै इन्सेक अभियानलाई नगरपालिकाको तर्फबाट सहयोग गर्न तयार रहेको बताउनु भयो ।
नगरपालिकाका प्रवक्ता एवम् वडा नं. ९ का वडा सदस्य दिपक थापाले इन्सेकले यस नगरपालिकामा सञ्चालन गर्न लागेको शिक्षा, स्वास्थ्य, खाद्य र आवास अधिकारका सवालमा हुने कार्यक्रमले आफूहरूलाई समेत ती अधिकारको विषयमा ज्ञान हासिल हुने र स्थानीय तहलाई उल्लेखित अधिकार कार्यान्वयनमा सफलता मिल्ने बताउनु भयो ।
इन्सेक प्रदेश २ का संयोजक राजु पासवानले इन्सेकले मानव अधिकार उल्लङ्घनका घटनाहरूको अभिलेखन कार्य मात्र नगरी मानव अधिकार प्राप्तिकोे लागि सचेतनाका साथै बहस पैरवीको पनि काम गरिरहेको बताउनु भयो ।
उहाँले शिक्षा, स्वास्थ्य, खाद्य तथा आवासको सवालमा यस परियोजनाले नगरपालिकासँग समन्वय गरी मानव अधिकारको प्रत्याभूति गराउन महत्वपूर्ण भूमिका खेल्ने बताउनु भयो ।
इन्सेक प्रदेश २ का कार्यक्रम फोकल पर्सन जागेश्वर यादवले संविधानले सुनिश्चित गरेको मौलिक हकलाई इन्सेकले स्थापित गराउन परियोजना सञ्चालन गरेको बताउनु भयो ।
परिचयात्मक कार्यक्रमका सहभागीहरूले आउने हप्ता भित्र नगरपालिकाका सबै क्षेत्र र वडाको प्रतिनिधित्व हुने गरी भेला राखेर मानव अधिकार समूह गठन गर्ने निर्णय समेत गरेको छ ।
