अनौपचारिक क्षेत्र सेवा केन्द्र (इन्सेक)ले बटेश्वर गापा मा गठन गरेको बालअधिकार समुहका पदाधिकारीहरुलाई दुई दिने बाल अधिकार शिविर तथा क्ष्मता अभिवृद्धि तालिम मङ्सिर २६ गते सम्पन्न गरेको छ ।
बटेश्वर गापा को सभाहलमा आयोजना गरिएको तालिममा मानवअधिकार शिक्षा कार्यक्रमका लागि श्री शिवशक्ति नमुना माध्यमिक विद्यालय, बटेश्वर र लक्ष्मी माध्यमिक विद्यालय, चित्रपुरमा गठित बालअधिकार समुहका पदाधिकारीहरुको सहभागिता रहेको थियो ।
तालिमको क्रममा सहभागिहरुलाई बालअधिकार समुहले गर्नुपर्ने काम, कर्तव्य र अधिकार, बालभित्ते पत्रकारिता र आचारसंहिता, नेतृत्व तथा क्षमता विकास, सामाजिक समस्या र त्यसको समाधानलगायतको विषयमा तालिम दिइएको हो ।
तालिम समापन कार्यक्रममा इन्सेक मधेश प्रदेशका संयोजक राजु पासवानले समग्र रुपमा मानवअधिकारको रक्षार्थ र बालअधिकारको क्षेत्राधिकार भित्र रहेर आफना काम, कर्तव्य गर्न विद्यार्थीहरुलाई आग्रह गर्नुभयो । उहाँले समाजमा व्याप्त सामाजिक, सांस्कृतिक तथा लैगिंक कुरुति र हिंसा, बालविवाह, दहेज प्रथालगायतको सवालमा न्युनिकरणका लागि पालिकासंग समेत समन्वय गरि बालअधिकार समुहले कार्यक्रम गर्नुपर्नेमा जोड दिनुभयो ।
मानवअधिकार निगरानी समुहका अध्यक्ष सुरज महतोले मानवअधिकारको रक्षा र बालअधिकारको संरक्षण, सम्वद्र्धनका लागि आफुहरुको अभियानमा जनप्रतिनिधीहरुको समेत साथ र सहयोगको अपेक्षा गर्नुभयो । तालिममा सहभागि ५० जनालाई प्रमाणपत्र समेत प्रदान गरिएको छ ।