अनौपचारिक क्षेत्र सेवा केन्द्र (इन्सेक) लुम्बिनी प्रदेशको आयोजना तथा डिसिएको आर्थिक सहयोगमा ०८१ चैत २१ गते एक दिने प्रदेशस्तरीय वातावरणीय मानव अधिकारकर्मीहरूको क्षमता अभिवृद्धि कार्यक्रम सम्पन्न भएको छ ।
नेपालगञ्जमा आयोजित कार्यक्रममा बोल्दै प्रमुख अतिथी डिसिएका कार्यक्रम व्यवस्थापक सुर्यकुमारी विश्वकर्माले विश्वव्यापी रूपमा जलवायु समस्या बढ्दै गएको र यो समस्या मानव अधिकारसँग जोडिएकाले वातावरणीय अधिकारका विषयमा आवाज उठाउनुपर्नेमा जोड दिनुभयो । उहाँले जलवायु परिवर्तनले कृषि उत्पादन, व्यवसायमा पारेको प्रभावबारे सङ्गठित भइ आवाज उठाउन र अभिलेखन जरुरी रहेको भन्दै त्यसमा इन्सेकले भूमिका खेल्नुपर्नेमा जोड दिनुभयो । उहाँले नागरिकको स्वच्छ वातावरणमा बाँच्न पाउन अधिकारलाई गम्भीर रूपमा लिन सरोकारवालाहरूलाई आग्रह गर्नुभयो ।
सो अवसरमा बोल्दै अनौपचारिक क्षेत्र सेवा केन्द्र (इन्सेक) लुम्बिनी प्रदेश कार्यालयका संयोजक भोला महतले इन्सेकले समय सान्दर्भिक मानव अधिकारका लागि पैरवी गर्दै आएको स्मरण गराउनुभयो । नागरिक, राजनीतिक अधिकारका लागि विगतमा इन्सेकले खेलेको भूमिका स्मरण गराउँदै उहाँले आर्थिक, सामाजिक, साँस्कृतिक अधिकारसँगै अब वातावरणीय अधिकारका लागि पैरवी गर्ने बताउनु भयो ।
उहाँले हावा, पानी, ध्वनी प्रदुषण सुधारका लागि सार्वजनिक महत्त्वका विषयमा सिमेन्ट कारखाना, उखु मिलका प्रदुषणविरुद्ध पिआइएल लिएर अदालत पुग्ने काम गरेको बताउनु भयो । संयोजक महतको अध्यक्षतामा भएको कार्यक्रममा लुम्बिनी प्रदेशका १२ जिल्लाका ३० जना वातावरण अधिकारकर्मीको सहभागिता थियो । सो अवसरमा डिसिएका कार्यक्रम व्यवस्थापक सुर्यकुमारी विश्वकर्मा, अधिवक्ता बसन्त गौतम र मानव अधिकारकर्मी प्रकाश उपाध्यायले प्रशिक्षण दिनुभएको थियो । कार्यक्रमको सहजीकरण इन्सेक नेपालगञ्जका कार्यक्रम अधिकृत टेकनाथ आचार्यले गर्नुभएकफ थियो ।
