अनौपचारिक क्षेत्र सेवा केन्द्र (इन्सेक) सोलुखुम्बुको आयोजनामा “नेपाल मानव अधिकार वर्ष पुस्तक २०२५ प्रकाशन पूर्व वार्षिक समीक्षा” कार्यक्रम मङ्सिर ३० गते सम्पन्न गरिएको छ ।
सन् २०२४ को जनवरी १ देखि डिसेम्बर १५ सम्म जिल्लामा इन्सेकले अभिलेखीकरण गरेका मानव अधिकार उल्लङ्घन तथा ज्यादतीका घटनामाथि समीक्षा गरिएको हो ।
जिल्लामा सन् २०२४ मा ४२ ओटा मानव अधिकार उल्लङ्घन तथा ज्यादतीका घटना अभिलेखीकरण भएको जानकारी सरोकारवालालाई दिइएको छ ।
समीक्षा कार्यक्रममा इन्सेक प्रतिनिधिले जिल्लामा सबै भन्दा बढी घरेलु हिंसा अभिलेखीकरण गरिएको तथ्याङ्क सार्वजनिक गर्नु भएको छ ।
इन्सेकको तथ्याङ्क अनुसार महिलाविरूद्ध हुने भेदभाव, दुर्व्यवहार, बलात्कार, बलात्कारको प्रयास र यौनदुव्र्यवहारका घटना आठ ओटा, हत्या तथा कुटपिटका घटना चार ओटा, नवजात शिशुको हत्या दुई ओटा, कुटपिटका घटना दुई र घरेलु हिंसाका २२ ओटा घटना अभिलेखीकरण गरिएको इन्सेकले जनाएको छ ।
समीक्षाका क्रममा जिल्लामा महिलामाथि हुने घरेलु हिंसाका घटना वृद्धि भएको पाइएको छ ।
समीक्षा कार्यक्रममा कोशी प्रदेशका सांसद बुद्धिकुमार राजभण्डारीले घटना किन भइरहेका छन् ? घटना न्यूनीकरणका लागि कसको भूमिका कस्तो हुनुपर्छ भनेर काम गर्न इन्सेकलाई सुझाव दिनु भयो ।
पत्रकार महासङघ सोलुखुम्बु, शाखाका उपाध्यक्ष गार्डेन राईले पत्रकार, इन्सेक र सरकारी निकाय सबैको पहलमा मानव अधिकार हननका घटनालाई न्यूनीकरण गर्न सकिने बताउनु भयो ।
कार्यक्रममा बोल्ने अधिकांशले इन्सेकले मानव अधिकारको क्षेत्रमा गरेको कार्यको उच्च प्रशंसा गरेका छन् ।
मानव अधिकार उल्लङ्घनाका घटना न्यूनीकरणका लागि सबै पक्षको सहकार्य र समन्वय आवश्यक रहेको अधिकारकर्मीले बताएका छन् ।
