अनौपचारिक क्षेत्र सेवा केन्द्र (इन्सेक) भोजपुरको आयोजनामा नेपाल मानव अधिकार वर्ष पुस्तक २०२५ को अर्धवार्षिक पूर्व समीक्षा कार्यक्रम असार १३ गते सम्पन्न गरिएको छ ।
नेपाल मानव अधिकार वर्ष पुस्तक २०२५ का लागि जिल्लामा भएका मानव अधिकार उल्लङ्घन तथा ज्यादतीका घटनामाथि पूर्व समीक्षा गरिएको हो ।
समीक्षा कार्यक्रममा इन्सेक प्रतिनिधिले सन् २०२४ को प्रथम ६ महिनामा जिल्लामा मानव अधिकार उल्लङ्घन तथा ज्यादतीका ४० ओटा घटना अभिलेख गरेको जानकारी दिनुभयो ।
जिल्लामा ६ महिनाको अवधिमा मानव अधिकार उल्लङघन तथा ज्यादतीका ४० ओटा घटना अभिलेख गरिएको छ । घरेलु हिंसाका ३२, महिला तथा बालिका बलात्कारका आठ ओटा घटना रहेका छन् ।
समीक्षा कार्यक्रममा सहायक प्रमुख जिल्ला अधिकारी कृष्णबहादुर बस्नेतले समाजमा अझै पनि विभिन्न खालका हिंसा हुने गरेकोले यसतर्फ ध्यान दिन आवश्यक रहेको बताउनु भयो ।
भोजपुर नगरपालिका उपमेयर निर्मला शेर्पाले महिला तथा बालबालिकामाथिका घटनाहरू न्यूनीकरणका लागि सबैको साझा अभियान आवश्यक रहेको बताउनु भयो । उहाँले महिला र बालबालिका घरपरिवारबाटै असुरक्षित रहुनञ्जेल माहिला तथा बाल अधिकारको रक्षाका लागि चुनौती हुने बताउनु भयो ।
जिल्ला प्रहरी कार्यालय भोजपुरका इस्पेक्टर विशाल लिम्वुले प्रहरीले समाजमा हुने अपराधिक घटना न्यूनीकरणमा भूमिका खेलीरहेको बताउनु भयो । उहाँले समाजमा मानव अधिकारका विषयमा केही चेतना आएको भएपनि महिला र बालबालिकामाथि हुने हिंसामा कमी नआएको बताउनु भयो ।
मानव अधिकार रक्षक सञ्जाल भोजपुरकी अध्यक्ष लीलामाया तामाङले पछिल्लो समयमा विभिन्न क्षेत्रबाट मानवअधिकार हनन् हुन नदिन भइरहेका प्रयासले समाजमा केही सकारात्मक भावनाको विकास भएको बताउनु भयो । समीक्षा कार्यक्रममा पत्रकार, मानव अधिकारकर्मीलगायतको सहभागिता रहेको थियो ।
