नेपाल मानव अधिकार वर्ष पुस्तक २०२१ प्रकाशन पूर्व सङ्कलन गरिएका मानव अधिकार उल्लङ्घन तथा ज्यादतीका घटनाहरूमाथि पुस ८ गते समीक्षा गरिएको छ ।
समीक्षाले जिल्लामा पछिल्लो एक वर्षमा बलात्कारका घटना बढेको देखाएको छ । इन्सेकले पुस ८ गते गाईघाटमा आयोजना गरेको समीक्षा कार्यक्रममा मानव अधिकारसँग सम्बन्धित १ सय ६ ओटा घटना मध्ये ६० ओटा घटना बलात्कारका भएको उल्लेख छ ।
बाल अधिकार अन्तरगत ३८ ओटा घटना बलात्कारका भएको इन्सेकले अभिलेख गरेको छ । महिला अधिकार अन्तरगत महिला बलात्कारका घटना २२ ओटा, बहुविवाहका १५ ओटा, घरेलुहिंसाका १२ ओटा, हत्या र हत्याको प्रयास ९ ओटा, अवैद्य गर्भपतनका एक ओटा, पत्रकारमाथि दुर्व्यवहार एक ओटा, राज्यपक्षबाट कुटपिट एक ओटा, बमविस्फोटका तीन ओटा घटना, बालबिवाहका दुई ओटा घटना भएको इन्सेकले जनाएको छ ।
समीक्षा कार्यक्रम प्रमुख जिल्ला अधिकारी चक्रपाणि पाण्डेले प्रहरी, प्रशासनमा आएका घटनालाई अभिलेखीकरणसँगै जिल्लाका विकास निर्माण, शिक्षा, स्वास्थ्य, रोजगारका सवाललाईसमेत मानवअधिकारसँग जोडेर तथ्यांकहरू सार्वजनिक गर्न आवश्यक रहेको बताउनु भयो ।
उहाँले कोभिड १९ ले पारेको असर, शिक्षा, स्वास्थ्यमा भएको समस्या, निषेधाज्ञामा जनताले भोगेका समस्यालाईसमेत उजागर गर्न सके राज्यलाई जिम्मेवार बनाउन सकिने बताउनु भयो ।
जिल्ला प्रहरी कार्यालयका एसपी भीमबहादुर दाहालले प्रभावकारी कानुन कार्यान्वनकै कारण मानव अधिकारसँग जोडिएका घटनाहरू बाहिर आउन सहज भएको बताउनु भयो ।
जिल्ला अदालतका श्रेस्तेदार धनबहादुर कार्कीले तथ्यांकले कानुन कार्यान्वयन र अदालती प्रक्रियालाई नै सहज भएको बताउनु भयो ।
गैसस महासंघ केन्द्रीय सल्लाहकार सृजना दनुवारले इन्सेकका दस्तावेजका कारण विगतमा भएका जघन्य अपराधका घटनाका दोषीलाई कारवाही गर्न सहज भएको बताउनु भयो ।
नेपाल पत्रकार महासंघ प्रदेश सचिव हरिकुमार राईले मानव अधिकार संरक्षण र सम्र्बद्धन गर्न सबै एकजुट हुनु पर्ने बताउनुभयो ।
महिला अधिकारकर्मी नजवुल खानले बलात्कारजस्ता जघन्य अपराधलाई सकेसम्म गाउँघरमा नै मिलाउने प्रयास गर्नु कानुनी कारवाहीका लागि गर्नु मुख्य चुनौती भएको बताउनु भयो ।
पत्रकार भक्तिविलास पोखरेलले नागरिकलाई सचेत र जिम्वेवार बनाउन सके त्यति नै मानव अधिकार उल्लंघनका घटना बाहिर आउने र न्यूनीकरणमासमेत सहज हुने बताउनु भयो ।
