संविधानले मौलिक हकका रूपमा नागरिकका धेरै अधिकारलाई सुनिश्चित गरेकाले अब विकासको अधिकारलाई मानव अधिकारसँग जोड्नु पर्नेमा सरोकारवालाहरूले जोड दिएका छन् ।
पुस ७ गते अनौपचारिक क्षेत्र सेवा केन्द्र (इन्सेक) इलामले नेपाल मानव अधिकार वर्ष पुस्तक २०२० को प्रकाशन पूर्व आयोजना गरेको समीक्षा कार्यक्रममा बोल्ने वक्ताहरूले विकासलाई मानव अधिकारसँग जोड्न आग्रह गरेका हुन् ।
समीक्षामा सहभागीहरूले बलात्कार, बहुविवाह, मानव बेचबिखन जस्ता घटनाहरूको न्यूनीकरणका लागि नागरिक समाज पनि उत्तिकै सचेत हुनुपर्नेमा जोड दिएका छन् ।
जिल्ला समन्वय समितिका प्रमुख गणेश बरालले जिल्लाको अस्पताल र स्वास्थ्य क्षेत्रमा निकै समस्या देखिएको बताउनुभयो ।
यस्तै प्रमुख जिल्ला अधिकारी सीताराम कार्कीले अब विकासको अधिकारलाई पनि मानव अधिकार सँग जोड्न आवश्यक रहेको बताउनुभयो ।
उहाँले भन्नुभयो–‘इन्सेकले पनि घटना अभिलेखीकरणको पद्धतिलाई परिवर्तन गरेर विकासको अधिकारलाई पनि समेट्नु पर्छ । अब शान्ति र विकासका विषयमा पनि समीक्षा गर्न जरूरी छ ।’
कार्यक्रममा सामाजिक अभियन्ता प्रकाश परियारले बलात्कार जस्ता घटनाको विषयमा प्रहरीले मुचुल्का तयार गर्दा नै सचेत हुन आवश्यक रहेको भन्दै मुचुल्कामै तोडमोड हुने कारण कतिपय पीडितले न्याय नपाउने गरेको बताउनुभयो ।
समीक्षा कार्यक्रममा इन्सेक प्रतिनिधि कोकिला ढकालले वर्ष पुस्तकमा समेटिने घटनाहरू समेटेर प्रतिवेदन प्रस्तुत गरेको गर्नुभयो ।
प्रस्तुत गरिएको प्रतिवेदनमा बलात्कारका २१ ओटा घटना, बहुविवाहका ८ ओटा घटना, बालविवाहको एक ओटा घटना र हत्याका तीन ओटा घटना उल्लेख गरिएको छ । प्रतिवेदनमा वर्षभरिमा तीन दिन बन्द भएको उल्लेख छ ।
