अनौपचारिक क्षेत्र सेवा केन्द्र (इन्सेक) पूर्वाञ्चल क्षेत्रीय कार्यालय विराटनगरको आयोजनामा असार ३१ गते सुनसरी सदरमुकाम इनरुवामा स्थानीय तहमा शिक्षाको अधिकारका सवाल विषयक अर्न्तक्रिया सम्पन्न भएको छ ।
समुदायलाई सचेत पार्दै जिम्मेवार निकायलाई जवाफदेहि बनाउने (इएलपी) परियोजना अन्तर्गत भएको कार्यक्रममा स्थानीय तहले शिक्षा क्षेत्रमा गर्नुपर्ने कार्यका बारेमा छलफल भएको थियो ।
इन्सेक क्षेत्रीय संयोजक सोमराज थापाको अध्यक्षतामा भएको कार्यक्रममा सहभागीले शिक्षा क्षेत्रमा भएका समस्याबारे जानकारी गराएका थिए । मानवअधिकार सञ्जालकी योशा गुरागाईले अझै पनि धरै बालबालिका विद्यालय बाहिर भएको र विपन्न बालबालिका विद्यालयको पहुँच भन्दा टाढा भएको बताइन् । पत्रकार राजेन्द्र पोखरेलले शिक्षाको गुणस्तरका लागि समुदायले विद्यालयको अपनत्व लिन पर्ने बताए । नागरिक निगरानी समूहका कमलकिशोर शर्माले विद्यालयको शिक्षा अपुरो रहेको भन्दै विद्यालयले पाठनपाठन संगसगैं स्वास्थ्य र वातावरणका कुरामा पनि ध्यान दिनुपर्ने बताए । हरि मावी चाँदवेलाका प्रधानाध्यापक काशीराम चौधरीले अब स्थानीय तहमा शिक्षालाई सवल र सुदृढ बनाउनका लागि नियम कानुन अभाव भएको बताए ।
कार्यक्रमका प्रमुख अतिथि जिल्ला शिक्षा अधिकारी खगेन्द्र सुवेदीले शिक्षा सुधारका लागि सबै पक्षको उत्तिकै भुमिका हुनुपर्ने बताए । जनप्रतिनिधीले आफ्ना ठाउँका शिक्षण संस्थाको बारेमा विषेश चासो दिएर काम गर्नु पर्ने उनको भनाइ थियो । जिल्ला शिक्षा कार्यालयले सुनसरीका ४ ओटा विद्यालयलाई नमुना विद्यालय बनाउन सुरु गरेको उनले जानकारी दिए ।
कार्यक्रममा विभिन्न विद्यालयका प्रधानाध्यापक, विद्यालय व्यवस्थापनि समितिका अध्यक्ष, सामाजिक संघसंस्थाका प्रतिनिधिको समेत सहभागीता थियो ।
शेखर ढकाल