अनौपचारिक क्षेत्र सेवा केन्द्र (इन्सेक) बागलुङले आयोजना गरेको परियोजना परिचयात्मक तथा मानव अधिकार समूह गठन कार्यक्रममा बोल्दै काठेखोला गाउँपालिका प्रमुख अमरबहादुर थापाले गाउँपालिकालाई सामाजिक, सांस्कृतिक र आर्थिक पक्षमा सबल बनाउन आफूहरू प्रतिबद्ध रहेको बताउनुभएको छ ।
उहाँले इन्सेकले गठन गरेको मानव अधिकार समूहलाई जनतालाई मानव अधिकारको बारेमा सू–सूचित गराउन र गाउँपालिकाका हरेक गतिविधिमा सकरात्मक भूमिका निर्वाह गर्न आग्रह गर्नुभएको थियो ।
उहाँले इन्सेक र मानव अधिकार समूहको सहयोग लिएर आगामी दिनमा गाउँपालिकाका निर्माण हुने योजना र कार्यक्रमहरू पूर्ण मानव अधिकारमैत्री बनाउने प्रतिबद्धता व्यक्त गर्नुभयो ।
कार्यक्रममा गाउँपालिका उपप्रमुख तथा न्यायिक समिति संयोजक अर्जुनबहादुर खत्रीले गाउँपालिकालाई महिला, बालबालिका र ज्येष्ठ नागरिक मैत्री बनाउनको लागि आफूहरू सधँै लागिपर्ने बताउनुभएको थियो ।
‘गाउँमा अझैपनि महिला पुरुषको बीचमा ज्याला विभेद छ ।’–खत्रीले भन्नुभयो–‘हाम्रोमात्र प्रयासले समान ज्याला लागु गर्न सकिएको छैन । इन्सेक र मानव अधिकार समूहले पनि सकारात्मक पहल गर्नुप¥यो ।’
कार्यक्रममा काठेखोला गाउँपालिका–८ का वडा अध्यक्ष चित्रा श्रीषले इन्सेकको तीन वर्षीय परियोजना सफल बनाउन आफूहरूले सक्दो सहयोग गर्ने प्रतिबद्धता व्यक्त गर्नुभएको छ ।
उहाँले जनप्रतिनिधि र कर्मचारीहरूले स–साना विषयहरूलाई पनि मानव अधिकारको दृष्टिकोणले हेर्ने हो भने समुन्नत समाज निर्माणको सपना पुरा गर्न समय नलाग्ने बताउनुभएको थियो ।
कार्यक्रममा इन्सेकका पूर्व जिल्ला प्रतिनिधि रामबहादुर जिसीले मानव अधिकार, इन्सेकका कार्यक्रम र तीन वर्षे परियोजनाको बारेमा जानकारी गराउनुभएको थियो ।
कार्यक्रममा भेषकुमारी भण्डारीको संयोजकत्वमा ११ सदस्यीय मानव अधिकार समूह गठन गरिएको छ ।
समूहमा राधिका खत्री, पुष्पा कुमारी गौतम, थमकुमारी श्रीष, सन्तु विक, सुस्मिता सापकोटा, भक्त कुँवर, धननमाया विक, गङ्गा परियार, थम्मन कार्की र थिरबहादुर राना रहनुभएको छ ।
