नारायण नगरपालिका–१ को कुइकानामा सञ्चालित आधारभूत स्वास्थ्य सेवा केन्द्र दुई बजे नै बन्द हुँदा सेवाग्राही मर्कामा परेको स्थानीयले गुनासो गरेका छन् ।
अनौपचारिक क्षेत्र सेवा केन्द्र (इन्सेक)को इएलपी कार्यक्रम अन्गर्तत असोज १२ गते स्वास्थ्य संस्थामै सेवाग्राही र सेवाप्रदायकबिचको अन्तरक्रिया कार्यक्रममा स्थानीय मीना नेपालीले दिउँसो दुई बजे नै स्वास्थ्यकर्मी फर्किने गरेको समस्या दर्शाउनुभयो ।
कुइकाना आधारभूत स्वास्थ्य सेवा केन्द्र स्थापना भएको एक वर्ष अवधिमा आधुनिक भवन भएपनि औषधि अभावले सेवाग्राही जिल्ला अस्पताल वा निजि मेडिकलमा जानुपरेको स्थानीय तुलसी कार्कीले बताउनुभयो ।
स्वास्थ्य सेवा केन्द्रप्रति विश्वास जगाउन नगरपालिकाले पर्याप्त औषधि व्यवस्था र सुरक्षित सुत्केरी सेवा सञ्चालनमा तत्परता लिनुपर्ने उहाँले सुझाव दिनुभयो ।
कार्यक्रममा स्वास्थ्य केन्द्रका अनमी पुष्पा थापाले सीमित साधन स्रोतमा सेवा दिइरहेको र प्राप्त सुझावका आधारमा सेवालाई थप प्रभावकारी बनाउँदै लिने प्रतिबद्धता जनाउनुभयो ।
कार्यक्रममा नारायण नगरपालिका–१ का सदस्य सन्तकुमारी रामजाली, नारायण नगरपालिका स्तरीय मानव अधिकार समूहका अध्यक्ष रेखा थापा, इएलपी परियोजनाका जिल्ला सहजकर्ता सीता बुढाले स्वास्थ्य सेवा प्रभावकारिता र मानव अधिकारको सवालमा विचार राख्नुभएको थियो ।
