सुनसरीको जिल्ला अदालत परिसरबाट गिरफ्तार गरिएका नेपाल कम्युनिष्ट पार्टी (नेकपा) का पाँच जना कार्यकर्ताहरू झापामा रहेको राष्ट्रिय मानव अधिकार आयोगले जनाएको छ ।
आयोगको क्षेत्रीय कार्यालय विराटनगरका मानव अधिकार अधिकृत सन्तोष आचार्यसहितको टोलीले चैत २० गते झापा प्रहरीको नियन्त्रणमा रहेका सो पार्टीका कार्यकर्ताहरूको अवस्था बुझेपछि यस्तो जानकारी दिएको हो ।
सुनसरी र झापा प्रहरीले गिरफ्तार गरिएका भनिएका कार्यकर्ता आफ्नो मातहतका प्रहरी कार्यलयमा नहरेको अभिव्यक्ति दिएपछि राष्ट्रिय मानव अधिकार आयोगले विज्ञप्ति जारी गरी अवस्था सार्वजनिक गर्न आग्रह गरेको थियो ।
सुनसरी प्रहरीले इटहरी उमनपा-९ का ३४ वर्षीय लक्ष्मण कार्की, २६ वर्षीय मोहन कार्की र ४२ वर्षीय रोशन ढकाल र धरान उमनपा-११ का ३५ वर्षीय सुरेश राई, धरान उमनपा-३ का २६ वर्षीय सुरज राईलाई चैत १८ गते सुनसरी अदालतले वकिलको रोहबरमा छोडेको केही बेरमै नियन्त्रणमा लिएको थियो ।
उनीहरूमध्ये सुरज र सुरेश इलाका प्रहरी कार्यालय झिलझिलेको नियन्त्रणमा र लक्ष्मण, मोहन र रोशन जिल्ला प्रहरी कार्यालय झापा चन्द्रगढीको बन्दीगृहमा रहेको राष्ट्रिय मानव अधिकार आयोग क्षेत्रीय कार्यालय विराटनगरकी प्रमुख मञ्जु खतिवडाले जानकारी दिइन् ।
उनीहरूलाई चैत २० गते सात दिनको म्याद थप गरी अनुसन्धान गरिरहेको प्रहरीले जानकारी दिएको समेत प्रमुख खतिबडाले बताइन् ।
राजनितिक आस्थाको बन्दी भएका कारण अन्यलाई राख्ने ठाउँमा नराख्न, खानपान र स्वास्थ्यको ख्याल राख्न प्रहरीलाई आग्रह गरिएको खतिवडाको भनाई छ ।
प्रदेश १, प्रहरी कार्यालयका एआइजी पशुपति उपाध्यायले एक जिल्लाको मुद्दा सकिएपनि अन्य जिल्लामा समेत मुद्दा भएकाले गिरफ्तार गरेर अनुसन्धान भइरहेको बताए ।