अर्जुनधारा नगरपालिकाका आवासविहीन स्थानीय जनताका लागि एकीकृत बस्ती निर्माण गरी बसोबासको व्यवस्था मिलाउने अर्जुनधारा नगरपालिकाका प्रमुख हरिकुमार रानाले प्रतिबद्धता व्यक्त गर्नु भएको छ ।
शिक्षा, स्वास्थ्य, खाद्य र आवासका विषयमा सेवाप्रदायक र सेवाग्राहीबिच अर्जुनधारामा मङ्सिर ३० गते अनौपचारिक क्षेत्र सेवा केन्द्र (इन्सेक) प्रदेश कार्यालय विराटनगर र मानव अधिकार समूह अर्जुनधाराले संयुक्त रूपमा आयोजना गरेको अन्तरक्रिया कार्यक्रममा रानाले सो प्रतिबद्धता व्यक्त गर्नु भएको हो ।
संविधानमा व्यवस्था भएका शिक्षा, स्वास्थ्य, खाद्य र आवासका अधिकार सुनिश्चितता गर्न नगरपालिका प्रतिबद्ध रहेको प्रमुख रानाले गास, बास, कपास र रोजगार मानिसको जन्मसिद्ध अधिकार भएकाले यी अधिकारको रक्षा गर्ने कार्यको थालनी गर्न अर्जुनधारा नगरपालिकाको खुदुनाबारीमा दुई बिघा क्षेत्रफलमा रहेको नगरपालिकको जग्गामा आवास निर्माण गर्ने कार्यको छिटै सुरूआत गरिने बताउनुभयो । उहाँले ती आवासमा घरवारविहीनलाई बासको व्यवस्था गरिने जानकारी दिनुभयो ।
सो नगरपालिकाको स्वास्थ्य शाखा प्रमुख मुकुन्द बस्नेतले पुस १ गतेदेखि उपमेयरसँग आमा शिशु कार्यक्रम लागू हुने जानकारी दिनुभयो ।
सहभागीले मिर्गौलाको अवस्थाको बारेमा निःशुल्क परीक्षण गर्न माग गरेकोमा कार्यक्रमस्थलमै उहाँले वर्षको एकपटक अर्जुनधारा नगरपालिकाका जनतालाई मिर्गौलाको परीक्षण निःशुल्क गर्ने प्रतिबद्धता जनाउनुभयो ।
कृषि शाखा प्रमुख दीपक गिरीले कृषकको निःशुल्क माटो परीक्षण शिविर सञ्चालन गर्ने बताउनुभयो ।
