१६ वर्षीया बालिकालाई बलात्कार गरेको कसुरमा जिल्ला अदालतले गेरुवा गाउँपालिका–५, बिन्द्राका १८ वर्षीय विकास थारुलाई १२ वर्ष कैद सजायको फैसला गरेको छ ।
जिल्ला अदालतका न्यायाधीश मनोज श्रेष्ठको ०८१ फागनु २७ गतेको इजालसले कसुर ठहर गर्दै १२ वर्ष कैद सजाय, ५ लाख रुपियाँ जरिबाना, ५० हजार रुपियाँ क्षतिपूर्ति र २० हजार रुपियाँ पीडित राहत कोषमा भराउने फैसला गरेको जिल्ला अदालतका श्रेस्तेदार कपिल पौड्यालले जानकारी दिनुभयो ।
पीडित बालिकालाई ०८१ भदौ २४ गते बलात्कार गरेको भन्दै पीडित पक्षले भदौ २६ गते जिल्ला प्रहरी कार्यालयमा उजरी दिएको थियो । घटनाका आरोपितलाई प्रहरीले भदौ २५ गते गिरफ्तार गरेको थियो । पीडितको स्वास्थ्य परीक्षण भदौ २५ गते बर्दिया अस्पताल, गुलरियामा भएको थियो । बलात्कार घटनाका पीडित बालिकालाई इन्सेकले ०८१ असोज १३ गते आर्थिक सहयोग गरेको थियो । पीडित बालिकाको आफन्तले दिएको निवेदनको आधारमा इन्सेक जिल्ला प्रतिनिधि मार्फत बालिकालाई १० हजार रुपियाँ सहयोग गरेको हो ।