विर्तामोड नगरपालिका-९ की १५ वर्षीया बालिका स्वस्तिका विष्टलाई निर्घात कुटपिट गरेको आरोपमा प्रहरीले ४५ वर्षीय बाबु प्रकाश भनिने नीरकुमार विष्टलाई माघ १६ गते गिरफ्तार गरेको छ ।
छुट्टीका दिन साथीसँग घुम्न हिँडेको र घरमा नबसेको आरोपमा छोरीलाई ०८१ माघ १६ गते पिलासले प्रहार गरी टाउको फुटाइ दिएको र भाटाले शरीरभरि निलडाम हुने गरी कुटपिट गरेको आरोपमा बालिकाकी आमा रेनुका विष्टले प्रहरीमा उजुरी दिनु भएको थियो ।
पीडित पक्षले आरोपितविरूद्ध माघ १६ गते इलाका प्रहरी कार्यालय, विर्तामोडमा उजुरी दिएपछि आरोपितलाई अनुसन्धानका लागि गिरफ्तार गरिएको इन्स्पेक्टर सन्तोष राईले बताउनु भयो ।
पीडित बालिकाको उपचार मेची प्रादेशिक अस्पताल, भद्रपुरमा भइरहेको छ ।
नेपालको शिक्षा ऐन, २०७६ र बालअधिकार ऐन, २०७५ ले बालबालिकामाथि शारीरिक वा मानसिक दण्ड दिन निषेध गरेको छ ।
बालअधिकार ऐनको दफा ६६ अनुसार, बालबालिकामाथि हिंसा गर्ने व्यक्तिलाई ३ वर्ष सम्मको कैद सजाय वा ३० हजार रुपियाँ जरिबाना, वा दुवै सजाय हुन सक्छ ।
नेपालको संविधान, २०७२ ले बालबालिकाको अधिकारलाई मौलिक हकको रूपमा सुनिश्चित गरेको छ ।
संविधानको धारा ३९ मा बालबालिकालाई शारीरिक, मानसिक वा यौन शोषणबाट बचाउनुपर्ने प्रावधान राखिएको छ ।