३१ वर्षीया महिलालाई सामूहिक बलात्कार गरेको कसुरमा बलरा नगरपालिका–४ का ३२ वर्षीय नविनकुमार यादव, ३४ वर्षीय पप्पु भनिने हरिशंकर राय, २९ वर्षीय महेश सहनी र ३१ वर्षीय प्रमोद राय भनिने अमरेशकुमार यादवलगायत चार जनालाई जिल्ला अदालत सर्लाहीले ०८१ वैशाख १३ गते चार वर्ष कैद सजायको फैसला गरेको छ ।
जिल्ला अदालतका न्यायाधिश सुर्यबहादुर थापाको इजलासले आरोपितहरूलाई चार/चार वर्ष कैद सजाय र २५ हजार रुपियाँ पीडितलाई क्षतिपूर्ति दिने गरी मुद्दाको अन्तिम फैसला गरेको श्रेस्तेदार सदन अधिकारीले जानकारी दिनु भयो ।
पीडितलाई आरोपितहरूले ०८० भदौ २१ गते सामूहिक बलात्कार गरेको भन्दै पीडित पक्षले इलाका प्रहरी कार्यालय बलरामा असोज ४ गते उजुरी दिनु भएको थियो ।
पीडितको स्वास्थ्य परीक्षण असोज ५ गते सर्लाही जिल्ला अस्पताल मलंगवामा भएको थियो ।
घटनामा संलग्न आरोपितहरू पुर्पक्षका लागि सिन्धुली जिल्ला कारागारमा रहेको श्रेस्तेदार अधिकारीले जानकारी दिनु भयो ।