४० वर्षीया महिलालाई बलात्कार गरेको कसूरमा बर्दगोरिया गाउँपालिका–१ बौनियाका ३५ वर्षीय चक्र ओडलाई ०८० असोज १४ गते तीन वर्ष कैद सजायको फैसला गरिएको छ ।
जिल्ला अदालत, कैलालीका न्यायाधीश ओमप्रसाद अर्यालको इजलासले कसूर ठहर गरी तीन वर्ष कैद सजाय र ३० हजार रुपियाँ जरिवाना भराउने फैसला गरेको जिल्ला अदालत, कैलालीका शाखा अधिकृत नवराज पाण्डेले बताउनु भयो ।
पीडित महिलालाई २०७९ मङ्सिर १० गते आरोपितले बलात्कार गरेको भन्दै पीडित पक्षले ०८० वैशाख ६ गते ईलाका प्रहरी कार्यालय, लम्कीमा उजुरी दिनुभएको थियो ।
प्रहरीले सरकारी वकिल कार्यालयमार्फत आरोपित विरुद्ध जबरजस्तीकरणी अन्तर्गत जिल्ला अदालतमा मुद्दा दर्ता गरेकोमा जिल्ला अदालतले वैशाख २९ गते आरोपितलाई पुर्पक्षका लागि थुनामा पठाउन आदेश दिएको थियो ।
पीडितको स्वास्थ्य परीक्षण ०८० वैशाख ६ गते टिकापुर अस्पताल, टिकापुरमा गरिएको थियो ।