अनौपचारिक क्षेत्र सेवा केन्द्र (इन्सेक) द्वारा भानु नगरपालिकामा गठन गरिएको मानव अधिकार समूहले भानु नगरपालिकामा पेस गरेका शिक्षा, स्वास्थ्य, खाद्य र आवाससँग सम्बन्धित अधिकांश मागलाई नगरपालिकाले वार्षिक एवम् दिर्घकालिन नीति, कार्यक्रम र बजेटमा सम्बोधन गरेको जनाएको छ ।
नगरपालिकाले भदौ १७ गते इन्सेकलाई पत्र लेखी मानव अधिकार समूहद्वारा विभिन्न मितिमा नगरपालिकामा पेश गरेको ध्यानाकर्षण पत्र प्रति नगर कार्यपालिका तथा नगरसभाको गम्भीर ध्यानाकर्षण भएको जनाएको छ ।
नगरपालिकाका वरिष्ठ अधिकृत सुनिल पाण्डेले हस्ताक्षर गर्नुभएको सो पत्रमा मानव अधिकार समूहले उठान गरेका शिक्षा, स्वास्थ्य, खाद्य र आवाससम्बन्धी सरोकारका विषय मध्ये विद्यालयको अपाङ्गमैत्री भौतिक पुर्वाधार, विद्यार्थीलाई दिवा खाजा, सूचना तथा सञ्चारको प्रविधिबाट शिक्षण सिकाइ जस्ता क्रियाकलापहरू नगरसभा र नगर कार्यपालिकाले वार्षिक बजेट तथा नीति र कार्यक्रममा समावेश गरेको जनाएको छ ।
त्यसैगरी स्वास्थ्य तर्फ कोभिड अस्पतालको स्तरोन्नती, कोभिड परीक्षण, कोषको परिचालन, स्वास्थ्य सेवा सञ्चालन, औषधि व्यवस्थापन, जेष्ठ नागरिक स्वास्थ्य सेवाको विषयलाई पनि सम्बोधन गरिएको पत्रमा जनाइएको छ ।
त्यस्तै खाद्य तर्फ कृषकहरूलाई उत्पादनमा जोड्ने, कृषि अनुदान, कृषकको प्रोफाइल तयारी, कोल्ड स्टोर निर्माण, कृषिमा आधुनिकी करण, कृषि तथा पशु वस्तुको विमा जस्ता सवाललाई पनि सम्बोधन गरिएको पत्रमा जनाइएको छ ।
मानव अधिकार समूहले पटकपटक ध्यानाकर्षण गराएका विषयहरूलाई नगरपालिकाले सकारात्मक रूपमा लिइ नगरसभा तथा नगर कार्यपालिकाको बैठक छलफल गरी सम्बोधन गरिएको वरिष्ठ अधिकृत पाण्डेले बताउनुभयो ।
मानव अधिकार समूहले विभिन्न समयमा माग गरेको कारण नीति तथा कार्यक्रममा यी विषयहरूलाई समावेश गर्न सजिलो भएको पाण्डेले बताउनुभयो ।
उहाँले आगामी दिनमा पनि मानव अधिकार समूहसँग छलफल गरी शिक्षा, स्वास्थ्य, खाद्य र आवास तथा अन्य मानव अधिकारका सवालहरूमा सहकार्य गरी अगाडि बढ्न नगरपालिका तयार भएको बताउनुभयो ।