देशका कतिपय ठाउँमा भेण्टिलेटर र आइसीयू बेड अभाव भएका खबरहरु आइरहेका छन् । तर, जिल्ला अस्पताल धनकुटामा भेण्टिलेटर र आइसीयू बेड राख्न ल्याइएका उपकरण जडान नहुँदा अलपत्र परेका छन् । ती उपकरण ल्याएको डेढ महिनाभन्दा बढी समय बितिसकेको छ ।
ठाउँ अभावकै कारण जडान हुन नसक्दा भेण्टिलेटर र आइसीयूका उपकरणहरू अलपत्र परेको जिल्ला अस्पताल धनकुटाका निमित्त मेडिकल सुपरिटेण्डेण्ट डाक्टर पुजन विश्वकर्माले बताउनु भयो । अस्पतालको दोस्रो तलामा ती उपकरणहरू त्रिपालले छोपेर राखिएको छ ।
नेपाल सरकारको जनसुरक्षा कोषको सहयोगमा चार ओटा भेण्टिलेटर सहितका १० ओटा आइसीयू बेड सञ्चालन गर्न करिब १ करोड ६५ लाख रुपियाँको लागतको खरिदमा उपकरणहरू ल्याइएको डाक्टर विश्वकर्माले बताउनु भयो ।
स्वास्थ्य कार्यालय धनकुटाको भवनमा अस्पतालको केही सेवा सहितको प्रशासनिक फाँट सारेर खाली भएको ठाउँमा भेण्टिलेटर सहितको आइसीयू बेडका लागि आवश्यक उपकरण जडान गर्ने प्रक्रिया अघि बढाइएको थियो ।
प्रदेश १ को सामाजिक विकास मन्त्रालयको मन्त्रीस्तरको बैठकले हालको स्वास्थ्य कार्यालय धनकुटा–४ देव्रेवासस्थित महिला विकास कार्यालयको नयाँ भवनमा सार्ने निर्णय गरेको थियो ।
प्रदेश १ का तत्कालीन् सामाजिक विकास मन्त्री जीवन घिमिरे धनकुटा आएर स्थान छनौट गरी कात्तिक ६ गतेका दिन उक्त निर्णय गरिएको थियो ।
केहीदिन अघि मात्रै स्वास्थ्य कार्यालय सरेको र उपकरण जडानको काम सुरु गरिएकाले दुई सातासम्ममा जडान हुुने विश्वकर्माले बताउनु भयो ।
अस्पतालले भेण्टिलेटर सहितको आइसीयू बेड राख्न आवश्यक पूर्वाधार निर्माणको लागि ठेक्का समेत लगाइसकेको छ ।
डाक्टर विश्वकर्मा भन्नुहुन्छ–‘ठेक्का लागिसक्यो । ठेकेदारले काम सुरू गरेका छन् ।’ असारसम्म निर्माण सम्पन्न गरिसक्ने गरी ३० लाख रुपियाँमा ठेक्का लगाएको पनि उहाँले बताउनु भयो ।
भेण्टिलेटर सञ्चालनको लागि एनेस्थेसियोलजिष्ट र फिजिसियनको आवश्यकता हुन्छ । तर, जिल्ला अस्पतालमा एनेस्थेसियोलजिष्ट, फिजिसियनको दरबन्दी नै कायम गरिएको छैन ।
जिल्ला अस्पताललाई विशेषज्ञ सेवातर्फको विज्ञापन र पदपूर्ति गर्ने अधिकार नभएको कारण हालसम्म पदपूर्ति गर्न नसकेको अस्पतालका सूचना अधिकारी राजन पोख्रेलले बताउनुभयो ।
‘प्रदेश १ सरकारको सहयोगमा गत आर्थिक वर्षको असार मसान्तमा चार ओटा भेण्टिलेटर प्राप्त भएको छ । जडानको काम भइरहेको छ । तर, जडानपछि पनि सञ्चालनमा आउन सक्ने अवस्था नै छैन ।’–पोख्रेलले भन्नुभयो–‘भेण्टिलेटर सञ्चालनको लागि आवश्यक जनशक्तिको व्यवस्थापन हुन सकेको छैन ।’
हाल कोभिड–१९ सङ्क्रमणको भयावह अवस्थामा यसको आवश्यकता धेरै नै रहेको छ । कोभिड–१९ सम्बन्धी उपचारको लागि आउने बिरामीहरुलाई आइसीयू र भेण्टिलेटरमा समेत राखेर उपचार गर्नुपर्ने हुन्छ ।
जिल्ला अस्पतालमा उपकरण भएपनि जडान नहुँदा सेवाग्राही छिमेकी जिल्ला सुनसरीको धरानमा रहेको बीपी कोइराला स्वास्थ्य विज्ञान प्रतिष्ठान पुग्नुपर्ने बाध्यता रहेको छ ।