चिकित्सकको लापरबाहीले शिशुको मृत्यु भएको आरोपमा अस्पतालमा तोडफोड

विर्तामोड नगरपालिका–५ का २४ वर्षीय विजय लिम्बूकी पाँच महिने छोरी विपीषा लिम्बूको उपचारमा चिकित्सले लापरबाही गरेका कारण मृत्यु भएको भन्दै पीडित परिवारले अस्पतालमा तोडफोड गरेका छन् ।
चिकित्सकले लापरबाही गरेको आरोप लगाउँदै मृतक बालिकाका आफन्तले मङ्सिर ११ गते मनमोहन मेमोरियल सामुदायिक अस्पतालमा तोडफोड गरेका हुन् ।
मङ्सिर १० गते अस्पताल भर्ना गरिएकी बालिकाको मङ्सिर ११ गते मृत्यु भएपछि आक्रोशित परिवार तथा आफन्तले अस्पताल तोडफोड गरेको इलाका प्रहरी कार्यलय विर्तामोडका डिएसपी मोहनकुमार थापाले बताउनु भयो ।
तोडफोडबाट पङ्खा, झ्याल, टेबलमा क्षति पुगेको अस्पताल प्रशासनले जनाएको छ । पीडित पक्ष, अस्पताल प्रशासन, जिल्ला प्रशासन र प्रहरीको सर्वपक्षीय छलफलबाट मृतकको नाममा ५ लाख रुपियाँको अक्षय कोष स्थापना गरिने सहमति भएको छ । शवको पोष्टमार्टम मङ्सिर ११ गते मेची अञ्चल अस्पतालमा गरिएको छ ।