राष्ट्रियसभाका सांसदहरुले ०८३ वैशाख ३० गतेको बैठकको शून्य समयमा मूल्यवृद्धि नियन्त्रण, रोजगारी सिर्जना, सुकुम्वासी समस्याको दीर्घकालीन समाधान खोज्ने सरकारको ध्यानाकर्षण गराएका छन् ।
जातीय विभेदका घटना न्यूनीकरण र रुग्ण उद्योग सञ्चालनमा ध्यान दिन पनि सांसदहरुले सरकारसँग आग्रह गरेका छन् । सांसद कमला पन्तले मुलुकको गौरवका रुपमा रहेको गोरखकाली रबर उद्योग पुनः सञ्चालनको तयारी सम्बन्धमा सरकारको जवाफ माग गर्नुभयो ।
त्यस्तै सांसद जयन्ती राईले अतिक्रमण हटाउने क्रममा विस्थापित भएका सुकुम्वासीको उचित व्यवस्थापन गर्न सरकारको ध्यानाकर्षण गराउनु भयो । सांसद दुर्गा गुरुङले दीर्घकालीन रुपमा सुकुम्वासी समस्या समाधान गर्न सरकारसँग आग्रह गर्नुभयो ।
साथै, सांसद नरबहादुर बिष्टले बाध्यकारी वैदेशिक रोजगारी अन्त्य गरी स्वदेशमै रोजगारीको अवसर सिर्जना हुने योजना ल्याउन सरकारको ध्यानाकर्षण गराउनु भयो। सांसद नारायणदत्त मिश्रले नागरिक अधिकार र लोकतन्त्रको रक्षामा सरकारको प्रतिबद्धता माग गर्नुभयो ।
त्यस्तै सांसद भुवनबहादुर सुनारले जातीय विभेदका घटना नियन्त्रणमा प्रभावकारी कदम चाल्न सरकारसँग आग्रह गर्नुभयो ।
सांसद मदनकुमारी शाह (गरिमा) ले कसैले पनि संसद्को अवमूल्यन गर्न नहुने बताउनु भयो । सांसद युवराज शर्माले सुशासन, मूल्यवृद्धि नियन्त्रण, विकास निर्माणलगायत विषयमा सदन र सरकारको ध्यानाकर्षण गराउनु भयो ।
सांसद राजेन्द्रलक्ष्मी गैरेले स्वास्थ्य क्षेत्रमा संवेदनशील हुन सरकारलाई सुझाव दिनु भयो भने सांसद सोनाम गेल्जेन शेर्पाले सिंहदरबारभित्र ट्राफिक नियम उल्लङ्घन गर्ने सवारीसाधनलाई कारबाही गर्न माग गर्नुभयो ।