नेपाल सरकारको ऐन अनुसार तलव स्केल लागु गर्न माग राख्दै नीजि अस्पतालमा कार्यरत स्वास्थ्यकर्मीहरुले ०८२ कात्तिक १९ गते बिहान जिल्ला प्रशासन कार्यालय धनुषा आगाडि प्रदर्शन गर्दै धर्ना दिएका छन् ।
सरकारी स्केल अनुसार तलब, स्वास्थ्यकर्मीको बीमा र सुरक्षाको व्यवस्था, हप्तामा ४२ घण्टा काम र स्वास्थ्यकर्मीको परिवारले निःशुल्क उपचार पाउनुपर्ने लगायतको माग राखी शान्तिपूर्ण प्रदर्शन गरिरहेको स्वास्थ्यकर्मी संघर्ष समितिका सदस्य नवेस अधिकारीले बताउनु भयो ।
यसैगरी जनकपुरधामको पिडारी चोकमा स्वास्थ्यकर्मीहरुले कात्तिक १८ गते गरेको शान्तिपूर्ण धर्नामा प्रहरीले हस्तक्षेप गर्दा स्वास्थ्यकर्मी रिमा मण्डल, रोशनी चौधरी, मधु कापर, अम्बिका यादव र संस्कार यादव घाइते भएको स्वास्थ्यकर्मी संघर्ष समितिका सदस्य अधिकारीले बताउनु भयो ।
स्वास्थ्यकर्मीहरुले कात्तिक १८ गते जनकपुर–ढल्केवर सडकखण्डस्थित पिडारी चोकमा बिहान ११ बजेदेखि चक्काजाम गरेपछि सडक सूचारु गर्न बल प्रयोग गरिएको प्रहरीले जनाएको छ । सोही क्रममा प्रहरीले स्वास्थ्यकर्मी ओम कापर, पशुपति यादव र आतिश सिंहलाई गिरफ्तार गरेकोे र साँझ सबैलाई रिहा गरिएको जिल्ला प्रहरी कार्यालय धनुषाले जानकारी दिएको छ ।
