तत्कालीन नेकपा माओवादीका कार्यकर्ताले चितवन जिल्लाको माडी क्षेत्रमा पर्ने कल्याणपुर गाविसको बाँदरमुढे खोलामा यात्रुबाहक बसमा विद्युतीय धराप विष्फोट गराएको १५ वर्ष बितिसक्दा पनि सत्य स्थापित हुन सकेको छैन ।
सत्य स्थापित नहुँदा पीडित र पीडितका परिवारको न्याय प्राप्तिसमेत ओझेलमा परेको छ ।
घटनालगत्तै ०६२ जेठ २३ गते नेकपा (माओवादी) का अध्यक्ष पुष्पकमल दाहालद्वारा जारी विज्ञप्तिमा घटनामा गल्ती भएको स्वीकार गर्दै घटनाको छानबिन गरी सत्यतथ्य सार्वजनिक गर्ने उल्लेख गरिएको थियो ।
त्यस यता उक्त विज्ञप्तिका हस्ताक्षरकर्ता दाहाल दुईपटक र उक्त पार्टीका नेता डा. बाबुराम भट्टराई एकपटक प्रधानमन्त्री हुँदा पनि यो विषयले प्राथमिकता पाउन सकेन ।
विस्तृत शान्ति सम्झौतालगायत अन्य राजनीतिक सहमतिहरूमा बाँदरमुढेलगायत घटनाका द्वन्द्व पीडितहरूको न्यायका सम्बन्धमा चर्चा गरिएको भए पनि न्याय र परिपूरणबिना १५ वर्ष बित्थामा बिते ।
बाँदरमुढे खोलामा ना १ ख ३२४५ नं. को बसमा २०६२ साल जेठ २३ गते नेकपा माओवादीका कार्यकर्ताले विद्युतीय धराप विष्फोट गराउँदा ३५ जना सर्वसाधारण र तीन जना सुरक्षाकर्मीसहित ३८ जनाको मृत्यु भएको थियो ।
उक्त घटनामा परी ७२ जना गम्भीर घाइते भएका थिए । घाइतेमध्ये चार जनाको घटनाको केही समयपछि मृत्यु भएको थियो । यसरी घटनामा मृत्यु हुनेको सङ्ख्या ४२ रहेको छ ।