घर परिवारसँग तीन महिनादेखि सम्पर्कमा नहरेका चङ्खेली गाउँपालिका–२ दार्म गाउँका १४ वर्षीय बालक शैलेन्द्र शाही मृत अवस्थामा भेटिएका छन् ।
गत साउन १२ गते दुध, दही लिएर लेकबाट घर फर्कँदै गर्दा बीच बाटोबाट हराएका बालक मृत फेला परेको मृतक बालकका बुवा जनखे शाहीले बताए ।
जनखे शाहीका अनुसार छोरालाई करिव तीन घण्टाको पैदल बाटो टाढा रहेको गाई खर्कबाट दुध ल्याउन पठाएका थिए । तर, छोरा लेकबाट फर्किसकेपछि बीचबाटोमै अज्ञात व्यक्तिले अपहरण गरी लगेको आशङ्का गरेको बताए ।
तीन महिनाको समयमा व्यापक खोजी गरेपछि असोज ११ गते घना जङ्गलमा स्याउलाले छोपेको अवस्थामा भेटिएको बालकका बुवाले बताए । बीचबाटै हराएका बालकको मृत्यु भई कङ्कालमात्र भेटिएको हो ।
बालक चङ्खेली गाउँपालिका–२ दार्मा गाउँको बालज्योती प्राथमिक विद्यालयमा कक्षा पाँचमा अध्यनरत थिए । त्यस्तै बालक अपहरण गरी हत्या गर्ने व्यक्तिबारे केही पनि जानकारी नभएको उनका आफन्त प्यारीलाल शाहीले बताए । जिल्ला प्रहरी कार्यालय हुम्लाका इन्स्पेक्टर गिहिन्द्र बोगटीले उक्त घटनाका बारेमा प्रहरीमा उजुरी नपरेको बताए । घटना सार्वजनिक भएसँगै अनुसन्धान सुरू गरिएको उनले बताए ।