अत्यधिक वर्षापछि गएको पहिरोका कारण इलाममा ३७ जनाको मृत्यु हुनुका साथै आठ जना घाइते भएका छन् । पहिरोमा परेर दुई जना बेपत्ता भएका छन् ।
इलामकी प्रमुख जिल्ला अधिकारी सुनिता नेपालले ०८२ असोज १७ गतेदेखि यताको वर्षाका कारण असोज १९ गते अपरान्हसम्म जिल्लाका विभिन्न क्षेत्रमा ३७ जनाको मृत्यु भएको हो । प्राकृतिक विपदको घटनामा आठ जना घाइते र दुई जना बेपत्ता भएको प्रमुख जिल्ला अधिकारी नेपालले बताउनु भयो ।
प्रमुख जिल्ला अधिकारी नेपालका अनुसार पहिरोका कारण सूर्योदय नगरपालिका १ मानेभञ्याङ्गमा एक जना महिला र चार जना पुरुष गरी पाँच जनाको मृत्यु भएको छ ।
इलाम नगरपालिका ६ घोसमा चार जना पुरुष र दुई जना महिला गरी ६ जनाको मृत्यु भएको छ । एक जना बेपत्ता भएका छन् ।
सन्दकपुर गाउँपालिकामा तीन जना पुरुष र तीन जना महिला गरी ६ जनाको मृत्यु भएको छ । पाँच जना घाइते भएका छन् ।
माङ्गसेबुङ्ग गाउँपालिकामा तीन जना महिलाको मृत्यु भएको छ । तीन जना घाइते भएका छन् ।
देउमाइ नगरपालिका पाँच जना पुरुष र तीन जना महिला गरी आठ जनाको मृत्यु भएको छ ।
माइजोगमाई गाउँपालिकामा तीन जना पुरुष र पाँच जना महिला गरी आठ जनाको मृत्यु भएको छ ।
काफफोक्थुम गाउँपालिकामा एक जना पुरुषको मृत्यु गरी जिल्लाभर प्राकृतिक विपदको घटनामा ३७ जनाको मृत्यु भएको छ । जिल्लामा पहिरोका कारण मृत्यु हुनेमा १७ जना पुरुष र २० जना महिला छन् ।
पहिरोमा परेर मृत्यु भएकामध्ये ११ जनाको असोज १९ गते जिल्ला अस्पतालमा पोष्टमार्टम गरी शव परिवारलाई जिम्मा लगाइएको छ ।
निरन्तर वर्षाका कारण झापामा ४ सय ५० घर परिवार डुवानमा परेका छन् । सुनसरी, उदयपुर र मोरङ्गका विभिन्न क्षेत्रमा बाढीका कारण सर्वसाधारण विस्थापित भएका छन् ।
इन्सेक कोशी प्रदेश