मानव बेचबिखन तथा ओसारपसारमा चार वटा फरकफरक मुद्दामा हाँडिखोलाकी २५ वर्षीया उर्मिला तामाङलाई चितवन जिल्ला अदालतले १५ वर्ष कैदको फैसला गरेको छ ।
न्यायाधीश विष्णुप्रसाद उपाध्यायको चैत ६ गतेको इजलासले विभिन्न चार वटा घटनामा संलग्न रहेको प्रमाणित गर्दै तामाङलाई १५ वर्ष कैद सजाय र ६० हजार रुपियाँ जरिबानाको फैसला गरेको हो ।
पहिलो मुद्दामा दुई वर्ष दोस्रोमा ११ वर्ष तेस्रोमा १२ वर्षर चौथो मुद्दामा १५ वर्ष कैद सजाय सुनाइएको अदालतका सूचना अधिकारी केशव पौडेलले जानकारी दिए ।
सबै मुद्दामा कैद सजाय जोड्दा ४० वर्ष हुन्छ । तर, सबै भन्दा बढी सजाय १५ वर्ष रहेकाले उर्मिलाले १५ वर्ष कैद सजाय भुक्तान गर्नुपर्ने पौडेलले बताए । यसै घटनाका अन्य दुई जना आरोपितले भने सफाइ पाएका छन् ।
पीडित युवतीलाई आरोपितले नयाँ दिल्लीमा पुर्याएर जबरजस्ती यौन कार्यमा लगाएको आरोप रहेको थियो ।
०७३ भदौ महिनामा दिल्लीमा रहेका एक नेपाली युवाको सहयोगले आफू भागेर नेपाल आउन सफल भएको उनले प्रहरीमा दिएको बयानमा उल्लेख छ ।